Nos t'ey pa Informa bo
Minister di Turismo Sr. Dangui Oduber. E ta yena bo di satisfaccion pa por mira nos waf yen di barconan crucero. Aruba ta ricibi un otro First Call di un mega crucero den e caso aki di Harmony of the Seas di Royal Caribbean Cruiselines. Conhuntamente cu e barconan crucero di Celebrity Reflection y Enchanted Princess tabata tin mas di 10 mil turista crucero diaranson riba Aruba. Esaki sigur ta refleha cu nos recuperacion ta den ful swing.
Minister Croes a splica cu loke ta fuel nos economia y e reduccion di desempleo ta turismo, pero si bo no ta hiba un maneho laboral cu ta pone yiunan di tera prome, bo porcentahe di desempleo no ta baha. Pa e motibo aki Minister Croes ta bisa cu como desempleo general y desempleo bou di hobennan ta bahando esaki ta un señal cu e maneho laboral di yiunan di tera prome ta funcionando. Banda di esaki tin e maneho di ‘local counterpart’ cu ta encera condicionnan na momento cu ta emplea un persona di afo pa, por garantisa cu tin transferencia di conocemento. Minister Croes a haci uzo di e oportunidad pa reconoce e bon trabou cu ta tumando luga di parti di DPL, ofreciendo servicio mas lihe y mas agil. “Ora cu tende minister di economia papia di haci servicionan mas lihe, e ta papia corectamente di personanan cardinal, di confiansa den funcionnan specialisa y den categorianan di excepcion. Dado momento mester bin cu fast track pre-approval di e permisonnan pa e categoria di excepcion y ehecutivonan pero bou di e filosofia di local counterpart, pa percura pa yiunan di tera tambe por probecha di oportunidadnan den funcionnan halto cu ta wordo crea.”
Oficina di Turismo, A.T.A., ta informa cu pa luna di october nos destinacion a ricibi un total di 83,404 bishitante “stay-over”. Si compara luna di october 2022 cu october 2019 – cu tabata e ultimo aña normal di turismo, por mira cu Aruba a recupera 105% di locual a wordo ricibi na october 2019.
E tres mercadonan cu mas a destaca den e cantidad di turista cu a bishita na october 2022 como tambe den grado di recuperacion den e diferente regionnan ta; Estados Unidos cu 61,156 bishitante cu ta representa un grado di recuperacion di 105% den comparacion cu october 2019, Hulanda cu 3,767 bishitante cu ta representa un grado di recuperacion di 104% den comparacion cu october 2019 y Colombia cu 3,291 bishitante cu ta representa un grado di recuperacion di 160% den comparacion cu october 2019.
Den luna di oktober 2022 Aruba a ricibi 83,404 turista via nos aeropuerto. Un cresemento di 5.1% den comparacion cu luna di oktober 2019 unda Aruba a ricibi 79,389 turista. Locual a resalta den e raportahe tambe ta e recuperacion di nos mercado mas importante cu ta Estados Unidos cu a registra un cresemento di 4.7% porciento compara cu oktober di aña 2019, esaki ta representa yegada di 61,156 turista for di USA. Turismo ta sigui recupera, sigui crece y sigui surpasa nivelnan di aña 2019 cual sigur ta excepcional.
Siman pasa A.T.A. a celebra YOU anniversary 2022. Esaki, pa conmemora aniversario di 27 miembro di ekipo cu hunto a celebra 325 aña di servicio. Esaki ta e di tres edicion unda A.T.A. ta celebra aniversario di su miembronan di ekipo desde cu Oficina di Turismo a comberti den un compania ‘Sui Generis’ na 2011. Mester bisa cu ta pone atencion tambe na ekiponan di A.T.A. na diferente mercado internacional tambe.
Recientemente a tuma lugar na Bogota, Colombia, e despedida di Miriam Dabian como Directora di Oficina di Turismo Aruba pa Latino America. Na mes momento a haci anuncio oficial di Jordan Schlipken- Croes kende lo ta e Director nobo pa dicho mercado.
Despues cu Jordan a termina su Master’s Degree na Spaña na 2017, Jordan a cuminsa traha na Oficina di Turismo na Bogota, Colombia como Marketing Specialist manejando asina 6 mercado (Colombia, Chile, Peru, Venezuela, Argentina y Brazil) como tambe tabata encarga pa crea e plan di mercadeo pa 2018 y 2019.
Aruba Ports Authority a celebra yegada di Celebrity Beyond y Norwegian Prima cu por cierto a yega Aruba diasabra ultimo. Marc Figaroa ta satisfecho con turismo crucero ta desaroyando. Ainda tin tres ‘first call’ mas p’e aña aki. Un di Royal Caribbean, un mas di Norwegian y un di Azamara.
Recientemente a tuma lugar na Bogota, Colombia, e despedida di Miriam Dabian, kende despues di un carera exitoso di casi 40 aña, a dicidi pa clausura e ciclo aki y dedica tempo na su mes y famia. Den un recepcion masha ameno a gradici Miriam pa tur su labor den e industria.
E reunion tuma lugar den e ballroom di Hilton Aruba Caribbean Resort & Casino, caminda cu tanto e agencia di PR; Zeno como tambe agencia di mercadeo; Big Village, a duna un presentacion extenso di kiko lo por spera pa 2023 den e plan di mercadeo pa Aruba. Esnan presente por a presencia algún idea nobo y otronan ‘out of the box’ pa mercadea e isla di Aruba den exterior y asina atrae aun mas bishitante pa nos isla. Pa clausura e meeting cu e ekipo di Norte Americano a realisa un tour na San Nicolas y experencia e preparacionan cu ta tumando lugar pa e proximo ‘Art Fair Festival’ como tambe a bishita e trapi na Rogers Beach cu ta bai inicia su proceso di embeyecemento.
Diasabra dia 22 di october 2022, tabata un dia cu henter Aruba por ta orguyoso, pasobra a yama bonbini na Norwegian Prima, un di e cruceronan mas nobo riba mercado n’e momentonan aki. CEO di Aruba Ports Authority N.V., Marc Figaroa a subi e barco pa personalmente yama capitan Gustavsen, su tripulacion y e mas di 2.100 pasaheronan bonbini na Aruba.
