Category: Politica

Director di DOW, sr. Croes a splicami dos punto cu mester tene cuenta cune pa cu e proyecto aki. 1. Gastonan concerni y 2. e permiso pa traha algo grandi riba e caminda, cu ta cay bou di “PPP project Green Corridor”, por tuma hopi tempo pa wordo ehecuta. Tin un otro manera cu nos por logra e mesun meta, mas siguridad riba e crusada aki, ta door di construi un “verkeersplateau” dilanti Springfield supermarket. Sr. Croes a bai haci su huiswerk y a sinta cu su stakeholders y mi ta contento cu awe e dia a yega cu e verkeersplateau ta wordo traha.

Ta berdaderamente hopi tristo, di basta tempo caba Hulp Bestuurskantoor San Nicolas ta den un estado deplorabel. Servicio cu ta wordo duna na comunidad di San Nicolas ta hopi limita. Awo a yega asina leu cu e mester a wordo cera. Mi ta compronde cu el a wordo cera paso ta toca un problematica di siguridad tanto pa e trahadonan y siguridad pe cliente. Ta hopi tristo y ta lamenta cu esaki mester a sosode. Di tur e MFA cu a wordo traha na Aruba, e edificio di San Nicolas ta un di nan cu mester a wordo traha prome. Tabatin un presupuesto disponibel pa tur 5 MFA y na final di dia net esun di San Nicolas no a wordo traha, door di un mal maneho.

Pronto presupuesto 2023 lo wordo trata den Parlamento di Aruba. E presupuesto aki ta un muestra grandi di e enfoke y seriedad cu cual nos gobierno ta trahando pa nos pais. Gobierno di Aruba a splica recientemente cu e economia di Aruba a crece di un forma formidable. Pais su entradanan tambe a subi y gobierno a usa e placa aki pa baha e deficit di presupuesto 2022 di 227 miyon pa 148 miyon, y aworaki probablemente di 148 miyon pa alrededor di 113 miyon.

“Hopi di e aumentonan exorbitante di coriente por a worde evita si Gabinete Wever-Croes a hedge y a sigui cu e programa di expansion di energia renobabel. Esaki ta muestra di negligencia di parti di Gabinete Wever-Croes y Utilities Aruba N.V. E negligencia aki por ta e base pa entama un caso legal contra di e aumento barbaro di coriente cu pueblo ta worde asota cune. Pa delibera riba esaki partido AVP ta organisa un renion caminda expertonan di ley di partido y externo lo informa esnan presente di e opcionnan cu tin pa bringa e aumento exorbitante aki di coriente, e lider di AVP, mr. Mike Eman a informa.

Practicamente tur dia prijs di petroleo ta bahando riba mercado mundial y segun miembro di fraccion di AVP, Arthur Dowers,  e momento a yega cu Prome Minister Evelyn Wever Croes, no por uza Putin como excuus mas.

Den bishita y reunionnan di bario e lider di fraccion di AVP mr. Mike Eman ta bisa cu e ta haya confirmacion di e pobresa y di e dolor den pueblo. “Costo di bida ta subiendo den un forma alarmante. Ta obvio cu e medidanan cu Gabinete Wever Croes a implementa durante e ultimo anjanan a impacta e cifra di inflacion severamente. Na 2017 ainda inflacion tabata menos cu 0%, esta – 0.6%. Na 2018 y 2019 esaki a subi drasticamente cu medidadanan di Gabinete Wever Croes. Y awor den 2022 e a yega un record na Aruba. CBS ultimamente ta raporta cu bestaansminimum practicamente pa luna ta subi cu 200 a 300 florin. Entre December 2017 y September 2022 por mira un aumento dramatico manera indica riba e tabelnan aki di CBS.