Category: Politica

Den e tratamento di presupuesto di 2023 gobierno a presenta un Nota di Cambio pa trece Aruba na un Surplus di 63 miyon florin cual ta 1% di nos GDP. Un noticia cu ta trece un dinamica completamente nobo den e scenario pa Aruba. No solamente den e negosacionnan cu Hulanda y Rijksministerraad, pero tambe den e temporada nos dilanti na Aruba mes. Esaki ta crea un perspectiva y trankilidad politico diferente pa asina gobierno por enfoca riba con nos ta sigui fortifica nos economia y atende cu e retonan pa 2023.

E siman aki tur hende por a scucha un otro episodio di caso di corupcion di mas grande den historia di Aruba, e caso di Avestruz cu Benny Sevinger como sospechoso principal. AVP, e partido berde den oposicion un biaha mas a briya cu su cultura di “corupcion comun.” Pueblo completo por a scucha, y ainda por scucha e requisitoire completo di e caso Avestruz, y asina deduci e abuso extremo cu a tuma lugar den e ministerio di Benito Sevinger, segun Ministerio Publico. Otro medionan di noticia popular paga pa AVP, no a publica ni transmiti e requisitoire completo y a exclui informacion pa pueblo, pa trata na defende nan patrosinadornan politico.

Cu HOPI FANFARIA Gabinete Wever Croes a anuncia cu un tono di celebracion cu nan a logra un surplus presupuestario pa anja 2023. Esaki ta indicativo pa locual ta spera nos pueblo pa e ana 2023 alabes ta confima mas medida doloroso riba nos pueblo. Esaki ta reaccion di Lider di Fraccion di AVP mr. Mike Eman despues di constata cu surplus lo worde busca for di saco di pueblo: aumento di BBO, dividendo di companianan di utlilidad cu ta haya e placa aki for di aumento di prijs di awa y coriente, no kier subsidia aumento di gas domestico, pago pa remedi, cobramento feroz di loonsubsidie cu ponemento di beslag, aanslagen di belasting ambtshalve cu no tin pia ni cabez; aumento di un cantidad di leges y otro medidanan.

No ta un secreto cu globalmente tin un crisis energetico andando. E impacto di e aumento drastico den petroleo, gas natural y scarcedad di diesel ta preocupante y tin su efectonan inflatorio global y ta complicando e recuperacion economico di hopi pais. Diesel su scarsedad ta masha preocupante mirando cu hopi trucknan, auto, fabricanan, barconan, diferente tipo di vehiculonan y industria ta depende di e fuel aki pa nan operacion. Esaki lo por afecta e crisis economico y energetico global mas ainda. Hulanda ta sufriendo di e segundo prijs di gas di mas halto na Europa. Miles di Hulandes no por paga e prijs di energia mas na cas y ta optando pa pasa frieuw e winter aki na nan cas. Esaki ta un gran realidad tur caminda na Europa y resto di mundo.

Simultaneamente cu e reunion pa atende presupuesto 2023 di pais Aruba a continua diahuebs mainta, den sala di corte e requisitoir den e caso Avestrus contra primordialmente Benny Sevinger tabata wordo lesa. Tur loke a keda presenta ta duna nos un bista riba un situacion hopi grave y di condena. Tin algun cos cu pa basta tempo ta conoci pero awe ora ta scucha tur cos, un tras di otro bo ta keda asombra con tin hende ainda por cana cabes na laira y sin ningun tipo di berguensa.

Nos por a wak con un oposicion desespera ta cuminsa dal salto di panico pa trata na hustifica nan acusacionan contra e presupuesto 2023 di gobierno. No ta nada straño di parti di oposicion, pasobra tur cos cu e gobierno aki a bin cu ne nan a bay contra di dje. Tur esaki oposicion ta haciendo, pa pueblo no enfoca nan mes riba e desaroyo di e caso di corupcion di mas grandi den historia di Aruba: Caso Avestruz

Durante e reunion publico di presupuesto 2023 mi a lansa diferente preguntanan cu ta preocupando pueblo. Un set di pregunta cu mi a haci tabata relata tocante di e salario minimo. E preguntanan aki a wordo respondi pa ambos minister Glenbert Croes y minister Geoffrey Wever. Ambos minister a contesta cu naturalmente prome cu tuma un decision asina aki, esaki mester cana su proceso. Dia 10 di November SER lo reuni cu e stakeholders pa asina nan por vocifera nan decision pa dia 17 di November. Ministernan a duna un amplio contesta si mester bin un aumento of no y con esaki lo por afecta pero tambe beneficia e homber chikito. A papia di un aumento di 4.3% of 7.7%. En todo caso ta SER lo onderbouw e decision, cual porcentahe esaki lo bira y comparti su recomendacion cu gobierno pronto.