MINISTER ENDY CROES :

ORANJESTAD:  Den conferencia di prensa di diabierna ultimo Sjoerd de Vries a anuncia e gran apertura Aruba Open Beach Tennis Championships 2022. Presente na e ocasion tabata Minister di Deporte, Aruba Tourism Authority, Andrea Stutto di Italia un di e miho hungadonan di mundo y internacional ITF referee Massimo Morelli. Aruba Open Beach Tennis ta e evento deportivo mas grandi den Caribe. Bushiri Beach un biaha mas ta scenario di e torneo mas popular di mundo cu e aña aki ta conta cu participacion di 1200 atleta di 40 diferente pais cu ta batayando 1 siman largo pa gana premionan balora na e suma total di $60,000.00. Weganan ta cuminsa tur dia pa 9’or di mainta. Minister Endy Croes ta felicita sr. Vries organisado di Aruba Beach Tennis Open y tur cu di un of otro manera a contribui pa haci e torneo aki un realidad despues di 2 aña. Alabes mandatario di Deporte ta invita henter pueblo di Aruba pa bishita e campeonato di tennis mas grandi den Caribe. Exito na tur atleta cu e deseo, disciplina, dedicacion y determinacion boso ta logra.

Minister Rocco Tjon:

GENEVA – Diamars merdia, Minister di Husticia y Asuntonan Social Rocco Tjon a hiba palabra na e di 41 sesion di e “Universal Periodic Review (UPR) of the Kingdom of the Netherlands” na Geneva, Suisa. E tema di e aña aki ta toca derechonan humano y kico tur e paisnan den Reino Hulandes ta haciendo of a haci caba, desde e ultimo UPR, pa asina mehora e derechonan humano.

Minister Glenbert Croes :

ORANJESTAD- Pais Aruba un biaha mas ta ser selecta pa ta e pais anfitrion pa e conferencia annual “German-Caribbean Energy Conference”.  Minister Glenbert Croes a splica cu pa 5 aña bou Minister President como Minister di Energia, a bin cu e iniciativa pa crea un Camara di Comercio di Hulanda y Alemania pa atrae empresanan Aleman den e sector energetico, ingenieria y tecnologia moderno pa organisa conferencianan na Aruba tur aña. Esaki cu e meta pa sondea posibilidadnan pa companianan Aleman inverti na Aruba yudando e isla desaroya e sector energetico y technologia cu nan capacidad

MINISTER ENDY CROES :  

ORANJESTAD: Dialuna atardi Minister Endy Croes tabata presente na aeropuerto internacional Reina Beatrix pa ricibi nos tri- atletanan femenino cu a regresa despues di a participa CARIFTA Triathlon & Aquathlon Championship 2022 cu a tuma luga na Bermuda. E hoben atletanan: Giovanna Wernet, Emma Gobert y Rebecca Jansen a conkista varios medaya durante e competencia. Den totalidad Aruba a logra un total di 10 medaya durante e dos dianan. Como pais Aruba a sali na di 3 luga di e competencia, esaki ta door di puntonan cu e ekipo acumula. Diamars den ora di atardi tri-atletanan masculino: Richard Sotelo, Christiaan Jansen y Jeon Fernandes ta regresa Aruba. Concluyendo Minister Endy Croes ta felicita y gradici nos tri-atletanan pa nan excelente prestacion y mayornan pa sostene nan yiu den nan deporte. Pabien cu excelente prestacion y logro. Nos ta orguyoso di boso!

Minister Maduro di Finansa ta informa:

E siman aki Parlamento ta trata Presupuesto 2023 cu ta un presupuesto historico pa nos Pais. Despues di 15 aña Gobierno ta logra entrega Presupuesto 2023 na tempo na Parlamento. Presupuesto 2023 ta contene un surplus di 63 miyon florin cu ta 1% di nos GDP. Ta prome biaha den historia cu full oposicion ta keda sin presenta den Sala di Parlamento pa trata e Ley di mas importante di nos Pais. Gabinete Wever-Croes ta skirbi un historia positivo pa nos Pais.

Prome Minister Evelyn Wever-Croes

Durante su disertacion den e reunion publico den Parlamento pa trata Presupuesto 2023, Prome Minister Evelyn Wever-Croes a contesta preguntanan cu Parlamentarionan a dirigi na dje. Tocante e relacion cu Hulanda, Prome Minister a expresa cu relacion cu Hulanda ta bon. Gobierno di Aruba ta purbando pa haci tur loke ta posibel manera cu Gobierno a compromete, pa evita e aanwijzing. Gobierno ta den cumplimento.

Prome Minister Evelyn Wever – Croes:

Relaciona cu e pregunta di e luznan na Bernhardstraat, haci pa Parlamentario Alvin Molina, Prome Minister a indica cu e ponemento di luznan a wordo entrega caba den man di Elmar.  Pa cu e proceso aki, Elmar a busca un consultant pa asina hunto traha un “business plan” na unda ta indica bou ki condicionnan nan lo tume over.  Elmar ta actualmente den diferente reunion cu e consultant na unda Bernhardstraat a wordo poni como prioridad, mientrastanto testnan ta wordo haci pa busca un solucion pa Bernardstraat. Prome Minister a informa cu e idea ta pa reemplasa tanto e mastnan como e luznan prome cu fin di aña 2022.

Prome Minister Evelyn Wever – Croes:

ORANJESTAD-Durante tratamento di presupuesto 2023 den Parlamento, Prome Minister Evelyn Wever-Croes a ricibi e peticion di Parlamentario sra. Shailiny Tromp-Lee pa duna un “update” con ta bayendo cu ehecucion di e landspakket. Riba e peticion aki, Prome Minister a informa Parlamento cu e proceso di ehecucion di e landspakket ta bayendo bon. E ekipo di “trekkers” pa cu e diferente temanan,  ta consisti di personanan hopi dedica y determina.  Prome Minister a splica cu loke si ta keda un punto di preocupacion ta e capacidad y financiamento.  Mirando cu ta e mesun personanan ta haci e mesun  trabounan ta pone cu e trabounan ta bira un poco mas duro. Pa e motibo aki, Gobierno di Aruba ta den combersacionnan cu Hulanda y tin como proyecto pa extende e capacidad pa por logra haya mas financiamento.

Minister Endy Croes:

ORANJESTAD: Diabierna atardi riba cancha di Denzel Dumfries di Cruyff Foundation na Jaburibari a tuma final di futbol femenino pa scolnan avansa den deporte escolar. E cuater scolnan Colegio Arubano, Colegio Nigel Matthew Aruba, EPB San Nicolas y La Salle College Aruba a bataya pa mira ta conkista e titulo maximo. Minister Endy Croes tabata presente pa duna sosten y apoyo na e futbolistanan den e final den Deporte Escolar 2022.

MINISTER ENDY CROES:

ORANJESTAD: Diadomingo mainta na Compleho Deportivo Frans Figaroa a tuma luga campeonato nacional di peso. Mandatario di Deporte a hiba palabra durante ceremonia di apertura di Aruba Nationals Championship 2022 organisa pa Amateur Weightlifting Association. Un total di 26 atleta local femenino y masculino a participa den categoria; “Youth Junior”, “Senior” y “Masters”. Ganado den categoria masculino senior: Laertes Araque cu 257 kg. Ganado absoluto den categoria femenino ta Nathaly Geerman cu a hisa total 195kg. Den categoria “youth” ganado absoluto hende muhe Caythyline Lanoy cu 123 kg. Den categoria masters ganado absoluto ta Rene Rudel cu a hisa 228kg. Minister Endy Croes ta felicita Amateur Weightlifting Association y tur cu a contribui pa haci e competencia uno exitoso! Masha pabien na e ganadonan.