MINISTER ENDY CROES:

ORANJESTAD: Diabierna ultimo Minister Endy Croes tabata presente na Cas di Cultura pa e gran apertura di e 30 edicion di Festival di Buki pa mucha. E festival ta enfoca riba muchanan di scol preparatorio y basico. Tema di e aña aki ta Biba Natura-Lesa. E festival a habri cu un show espectacular di baile y canto di nos muchanan como tambe presentacion di autornan cu lo presenta nan bukinan na e muchanan durante henter siman. Ademas a estrena e jingle nobo dedica na e Festival di Buki cu e tema: “Biba Nos Naturalesa”. Festival di Buki pa mucha a habri cu mensahe di Prome Minister Evelyn Wever- Croes y a clausura cu un invitacion di Minister Endy Croes pa e muchanan pa participa den e siman di buki. Mandatario di Enseñansa ta enfatisa cu ta hopi importante pa nos promove, siña y inspira nos muchanan pa lesa, pasobra door di lesa bo ta crece bo conocemento, amplia vocabulario, mehora e memoria y abilidad cognitivo.

Minister Endy Croes:

ORANJESTAD: Diabierna ultimo a tuma luga apertura oficial di Aruba College Fair, despues di cuater aña. Universidad, hogeschool y colleges di e.o. Hulanda, Merca, Canada, Costa Rica, Suiza, Region Caribe y Aruba tabata presente pa duna informacion na studiantenan di nan programanan di estudio avansa. Como tambe di loke e scol ta ofrece pa asina e studiante pa bon informa na momento cu e dicidi di continua cu su estudio despues di caba scol secundario na Aruba. Meta di College Fair ta pa brinda oportunidad pa e studiantenan bin y busca informacion pa tuma decision concreto pa su futuro. Mester remarca cu varios compania local tambe tabata presente pa expone cuponan cu tin y asina dune un studiante e chens pa traha of haci un escohencia den cua tipo di estudio por sigui, pa por traha na un di e companianan participante. Durante e merdia ameno mandatario di Enseñansa a hiba discuro y asina oficialmente habri Aruba College Fair 2022. Concluyendo Minister Endy Croes ta gradici Aruba College Fair pe invitacion alabes ta felicitanan cu un evento exitoso.

Minister Rocco Tjon:

ORANJESTAD – Mundialmente, dia internacional di mucha ta wordo conmemora riba e fecha di 20 di November. Na Aruba esaki no ta diferente, pero loke si ta diferente ta cu na aña 2018, Gobierno di Aruba a introduci pa prome biaha e “Siman di lantamento di mucha”. E siman aki ta wordo conmemora anualmente y ta encera un siman den cual ta pone enfasis riba con ta lanta muchanan na un manera positivo, pa nan por desaroya te cu nan maximo potencial. E ta un siman yena cu actividadnan pa mayornan y nan yiunan. E aña aki ta e prome lustro, pues ya caba ta di 5 aña cu ta organisa esaki, cual no ta un esfuerso di parti di Gobierno di Aruba so, pero tambe di  diferente organisacionnan no-gubernamental.

MINISTER ENDY CROES A FIRMA MOU

ORANJESTAD: Diaranson atardi Minister Endy Croes a reuni cu Arubaanse Bond van Motorsports (ADRA) y Aruba Drag Racing Association (ABM) unda a firma un MOU. Mandatario di Deporte a expresa despues di basta inkietud cu nos a scucha di diferente partidonan rond den e mundo di drag race como Minister nos a intermedia pa pidi cooperacion. E partidonan a bay di acuerdo pa forma un comision unda cu ABM ta nombra dos miembro como tambe ADRA ta nombra dos miembro cu ta representa tur e coredonan.

Minister Rocco Tjon:

ORANJESTAD –  Diaranson mainta, Minister di Husticia y Asuntonan Social Rocco Tjon, tawata presente na BRA pa asina atende e reunion di Codigo di Proteccion entre e delegacionnan di Aruba y Curaçao. Ta trata di un proyecto importante cu a inicia na 2019 for di e Sociaal Crisis Plan, cu e meta pa brinda mas siguridad na nos muchanan. Di parti di Ministerio di Husticia y Asuntonan Social nos ta sumamente contento cu e proyecto aki, y con el a desaroya e ultimo añanan, caminda a structura procesonan mucho mas miho entre e cuater sectornan esta; enseñansa, salubridad publico, social y hudicial. E balor agrega a wordo prueba caba, pa cual motibo nos ta contento cu por comparti experencia cu coleganan di Curaçao.

Minister Xiomara Maduro a ricibi ‘Huisje 103’

Recientemento e compania KLM a celebra 103 aña di existencia y relaciona cu esaki, nan a dedica un cas di Delfts Blauw na Aruba. Un dedicatorio masha special na nos Pais. Sigur ta un placer pa mira Cas di Famia Ecury bira ‘Huisje 103’ di KLM Delfts Blauw. Di e manera aki ta honra e esfuerso cu e famia aki a haci como un pionero den comercio na Aruba y tambe sr. Boy Ecury cu a mustra curashi pa defende Hulanda den segunda guera mundial. Minister di Cultura Xiomara Maduro ta gradici sr. Danilo De Freitas di KLM cu a trece ‘Huisje 103’ pa su persona hunto cu sr. Pancho Geerman di MANA cu a percura pa tabata un bon anfitrion pa e celebracion di KLM cu a tuma luga dilanti Ecury complex algun siman atras. Masha pabien KLM y masha danki pa kere den Aruba pa casi 100 aña caba.

30 AÑA DI FESTIVAL DI BUKI MUCHA

ORANJESTAD: Den cuadro di celebracion di 30 aña di Festival di Buki pa mucha otro siman, directora di Biblioteca Nacional, sra. Astrid Britten y sra. Zetsia Ponson a entrega Minister Endy Croes y coleganan Minister dos buki dedica na e siman aki. Ta trata di e buki Biba Naturalesa y 30 aña di cantica di mucha.
E aña aki tin dos buki: Jair y e buriconan skirbi pa sr. Wouter Goudswaard, ilustrado sr. James Ocalia y traduccion di Hulandes pa Papiamento sra. Lilian Semeleer pa e muchanan di klas 1,2 y 3 di scol basico. E buki titula Gosa den Naturalesa, di e autor sra. Evelien van Dort y ilustra pa sr. Paul Wong ta special pa alumnonan klas 4, 5 y 6 di scol basico

Minister Maduro: den cuadro di ‘Siman di Buki:’

Otro siman ta ‘Siman di Buki’ y den cuadro di esaki, Conseho di Minsiter a ricibi di Biblioteca Nacional dos buki dedica na e siman aki. Ta trata di e buki ’30 aña di cantica pa mucha’ y e buki ‘Biba Naturalesa’ cu ta e buki cu lo ta gratis disponibel pa nos muchanan den e ‘Siman di Buki.’ Minister Maduro di Cultura ta gradici y felicita Biblioteca Nacional y tur e partnernan cu ta coopera pa asina por celebra e aña aki e di 30 aniversario di ‘Siman di Buki’ na Aruba.

Secretario General di MEP Endy Croes:

Secretario General di MEP a sigui e caso Avestruz hopi di cerca. Siman pasa pa ta exacto 24 y 25 di october Benny Sevinger ex minister y actual Parlamentario di AVP sirbiendo pueblo (berguensa total) tabata dilanti mesa berde como e sospechoso principal den e caso di Avestruz. Tanto Leoncita Arends di Canal 90, “Chief” di Bureau F. Every y Abath kende tambe tabata traha den Bureau di Benny Sevinger tabata entre esnan cita pa ta na corte.

Minister Endy Croes: A FIRMA CONTRACTO CU ROC MONDRIAAN DI HULANDA.

ORANJESTAD: Durante siman Mandatario di Enseñansa a firma un contracto “samenwerkingsovereenkomst” cu ROC Mondriaan di Den Haag, EPI y SEPB. ROC Mondriaan ta duna 240 estudio na 26 scol na Hulanda. E contracto ta enfoca riba e estudio di Salubridad y Servicio. E meta di e contracto ta pa e scolnan traha hunto y comparti conocemento cu otro.  Minister Endy Croes a indica cu contracto ta inicia mesora y tin un duracion te cu januari 2026. Na luna di mei 2024 lo evalua con e proyecto ta bayendo. Minister Endy Croes a enfatisa cu esaki ta e inicio y no ta descarta cu mas estudio den diferente sector. Finalisando e dignatario a agrega cu tabata un bon reunion sigur un bon inicio nos lo traha hunto na bienestar di enseñansa general di nos pais.