Category: Gobierno

Diahuebs mainta, Prome Minister Evelyn Wever-Croes a reacciona riba un mail anonimo cu ta circula cu contrincantenan politico a publica tocante Arubahuis. Ta trata aki di un email di mei 2021, den cual ta menciona cosnan cu no ta bay bon den Arubahuis. Prome Minister a enfatisa cu el a ricibi e email aki y ta na altura di dje y ta e denuncianan den e mail aki a conduci cu Prome Minister mes a pidi pa haci un investigacion riba Arubahuis. Por lo tanto, email anonimo aki tambe ta parti di e investigacion den cuadro di Arubahuis. “Mi por bisa asta cu, esun cu a manda e email anonimo aki cu a resulta di ta parti di e investigacion, tambe ta parti di dje”.

Prome Minsiter a indica cu comision a duna Gobierno e conseho pa mantene e frontera cera principalemente pasobra ainda ta na mesa di deliberacion y tambe pa motibo di e riesgonan cu tin. Gobierno ta haci esaki a traves di un Landsbesluit cu ta saca cada tres luna of menos. E ultimo conseho tabata pa prolonga ciera pa tres luna te na fin di aña. Pero si keda cla cu palabracionnan prome, por haci cambio y habri frontera.

ORANJESTAD – Recientemente, minister di Husticia y Asuntonan Social Sr. Rocco Tjon a reuni cu e investigadonan academico di IPA y Vrije Universiteit Amsterdam, kende ta e investigadonan cu ta bay ehecuta e investigacion “quality of life of the Aruban youth”. Ministerio di Husticia y Asuntonan Social ta kere den “evidence based policy”, y a base di e informacion cu ta bay wordo colecta di e investigacion aki, lo bay traha un plan di maneho multianual pa cu esaki.

Diaranson mainta, durante reunion publico den Parlamento, Prome Minister Evelyn Wever-Croes y Minister di Husticia, señor Rocco Tjon, a duna splicacion amplio riba e tematica di frontera cu Venezuela. Prome Minister a enfatisa cu esaki ta un tema dificil y delicado y a remarca cu Gobierno di Aruba ta na mesa cu autoridadnan di Venezuela pa yega na bon palabracion riba un apertura di e frontera sigur y responsabel.

Minister Tjon a indica cu Gobierno di Aruba tin e deber y e responsabilidad di mira e situacion di cada angulo y tene diferente aspecto den consideracion. Entre otro e deber ta pa tene cuenta cu aspectonan di salubridad publico, aspectonan di siguridad di cada ciudadano, aspectonan di asilo, y e situacion financiero di pais Aruba, pa menciona algun cos. Como tal, e decision pa habri e frontera ta algo cu tin cu bay den fase, pues no ta un decision cu por wordo tuma facilmente.

Awe Directie Ouderenzaken a organisa un charla informativo pa celebra Luna di Adulto Mayor. E charla a toca e tema di e situacion financiero di adulto mayor na Aruba. Jonathan Upegui di Central Bureau of Statistics Aruba, Maritza Krozendijk di RBC Royal Bank y Wilbert Marchena di Departamento di Asunto Social a duna un splicacion y a contesta preguntanan di e publico. Directie Ouderenzaken ta gradici e panelistanan y nos moderador Edward Erasmus pa un tremendo presentacion. Ademas un palabra di danki na OPPA Aruba pa uzo di nan facilidad. Directie Ouderenzaken conhuntamente cu CBS lo sigui organisa charla informativo pa asina stimula participacion den luna di oktober.