Nos t'ey pa Informa bo
ORANJESTAD – Diasabra ultimo, a cumpli cu otro proyecto mas, caminda a instala e ekipo nobo den e Radarkamer di Cuerpo Policial di Aruba. Minister di Husticia y Asuntonan Social Rocco Tjon ta sumamente satisfecho cu e trabounan haci, y ta anuncia cu Aruba su fronteranan ta mucho mas sigura, danki na e instalacion di e tercer radar.
Sclavitud ta un topico cu mester papia riba dj’e. Otro aña ta cumpli 160 aña di Abolicion di Sclavitud den Reino Hulandes. Hulanda ta prepara pa brinda despensa pa e actonan haci contra dignidad humano haci den nos historia comparti den Reino Hulandes. Na e momentonan aki tambe denter di Reino ta sondea na ki manera lo por brinda un reparacion pa e daño haci. Na Aruba e topico di sclavitud no ta ser papia hopi di dj’e y pesey un dialogo a wordo habri cu algun grupo di interes, ‘stakeholders,’ cu e meta pa conscientisa comunidad riba e topico di ‘Sclavitud na Aruba.’
Diadomingo mainta Minister Maduro di Cultura a yama Sinterklaas y su Pietnan bonbini na waf di Harbour Arena. Dilanti un multitud grandi di mucha presente na waf, e mandatario a splica Sinterklaas cu tur mucha a haci bon mucha na Aruba y ta pidi Sinterklaas pa trece e regalo di mas bunita pa tur mucha, cual ta amor y alegria. Sinterklaas a sorprende Minister Maduro cu e bunita buki ‘Academia di Piet’ den cual Sinterklaas ta splica tur e cambionan cu tin cu e celebracion di Sinterklaas y su Pietnan di color. Cada color tin un bunita nificacion y pesey e biaha aki Sinterklaas ta desea pa tur mucha haya sa di nan.
ORANJESTAD: Diahuebs anochi den un esfera ameno a tuma luga introduccion di un proyecto nobo pa deporte di baseball “Proline Winter Baseball League”. Durante e “Drafting Night” e cuater ekiponan, manager y “coaching staff” a keda conoci. Ekiponan di Panthers, Tigers, Lions y Jaguars lo midi forsa contra di otro pa seis siman largo pa conkista e titulo di campeon, di e prome edicion di Proline Winter League. E campeonato di baseball lo bira uno di aproximadamente 40 wega di hungadonan den e edad di 18 aña pariba hungando den baseball na e.o. Aruba, Curaçao, Italia, Hulanda, Czechoslovakia y Merca.
Diahuebs ultimo Ministerio Publico a traves di fiscalnan Rethmeier y Van Erp a lesa e requisitoir den corte dilanti hues den presencia di e acusadonan. Ta trata di un total di 12 acusado pero di cual e “inner circle” di Benny y AVP ta un man di hende cu a facilita e corupcion considera esun di mas grandi den historia di Aruba. Nunca antes a pasa den un mandatario nan cabes den e ultimo 50 añanan pa masacra y horta Aruba na e manera aki y enrikece un grupo di amigo.
ORANJESTAD – Diabetes ta wordo categorisa como un malesa no transmitibel. E malesanan aki tin e tendencia di un duracion largo y ta e resultado di un combinacion di factornan. Diabetes por ta genetico of por desaroya dor di un bida no saludabel. Diabetes ta causa problemanan cardiovascular, ceguera, problema cu riñon y amputacion di pia. Na Aruba tin casi 10 mil persona cu ta uza un remedi pa diabetes cu ta representa 8% di e poblacion. Minister Oduber a menciona cu diabetes tin atencion di Gobierno y ta forma parti di e plan nacional di prevencion di malesanan no transmitibel.
Diabetes ta un malesa cronico cu ta pasa ora cu nos pancreas no por produci insulina, of ora e curpa no por haci bon uzo di e insulina cu e ta produci. Insulina ta un hormoon cu ta wordo traha den e pancreas y ta actua manera e yabi pa laga glucose, cu nos ta come den nos cuminda, pasa di nos sanger pa nos celnan di curpa y asina produci energia. Tur cuminda cu ta consisti di carbohidrato (pan, hariña, pasta, aros, batata, sucu etc.) ta wordo converti den glucose den nos curpa. Nos curpa mester di insulina pa cambia glucose (cu nos ta come den nos cuminda) pa energia pa nos celnan. Si no tin insulina of no tin suficiente, esaki por conduci na nivelnan halto di sucu den sanger. Si esaki dura pa largo tempo e por afecta e curpa y causa fayo na diferente organo manera entre otro riñon y wowo.
ORANJESTAD – E pandemia a dal Aruba duro causando un debe adicional di 900 miyon florin. Na 2020 tabatin un deficit di 1028 miyon florin y e aña aki Gobierno di Aruba a presenta un presupuesto 2023 cu 63 miyon florin surplus. Prome Minister Evelyn Wever – Croes a expresa cu e forma con a elimina e deficit cu tabatin ta algo hopi impresionante y remarcabel, cual no tabata facil pero a logra. 2023 lo no ta un aña facil, pero e surplus ta duna espacio financiero den presupuesto pa por financia inversionnan, casnan di cuido y lo por inverti mas den cuido en general.
ORANJESTAD – Siman pasa a tuma luga tratamento di presupuesto 2023 den Parlamento di Aruba. Desde dialuna diferente Minister di Gabinete Wever – Croes II, tabata na turno pa trata presupuesto di cada Ministerio. Diabiera tabata turno di Minister Xiomara Maduro y Prome Minister Evelyn Wever – Croes, pa cual Prome Minister a elogia e forma con Parlamento a trata e presupuesto.
Minister Croes a splica cu loke ta fuel nos economia y e reduccion di desempleo ta turismo, pero si bo no ta hiba un maneho laboral cu ta pone yiunan di tera prome, bo porcentahe di desempleo no ta baha. Pa e motibo aki Minister Croes ta bisa cu como desempleo general y desempleo bou di hobennan ta bahando esaki ta un señal cu e maneho laboral di yiunan di tera prome ta funcionando. Banda di esaki tin e maneho di ‘local counterpart’ cu ta encera condicionnan na momento cu ta emplea un persona di afo pa, por garantisa cu tin transferencia di conocemento. Minister Croes a haci uzo di e oportunidad pa reconoce e bon trabou cu ta tumando luga di parti di DPL, ofreciendo servicio mas lihe y mas agil. “Ora cu tende minister di economia papia di haci servicionan mas lihe, e ta papia corectamente di personanan cardinal, di confiansa den funcionnan specialisa y den categorianan di excepcion. Dado momento mester bin cu fast track pre-approval di e permisonnan pa e categoria di excepcion y ehecutivonan pero bou di e filosofia di local counterpart, pa percura pa yiunan di tera tambe por probecha di oportunidadnan den funcionnan halto cu ta wordo crea.”
This will close in 0 seconds
