Category: Gobierno

Education Gobierno

NOS TABATIN UN REUNION FRUCTIFERO CU COLEGIO NIGEL MATTHEW.

ORANJESTAD: Diahuebs atardi Minister di Enseñansa tabatin un encuentro pa sera conoci y combersa cu representantenan di Colegio Nigel Matthew. E scol cay bou di Dienst Publieke Scholen (DPS) cu ta resorta directamente bou di Ministerio di Enseñansa. Presente na e ocasion tabata sr. Ivor Curry, sra. Thais Kock y sra. Jennifer Kock. E tabata un reunion fructifero unda cu e representantenan por a vocifera nan inkietudnan y necesidadnan.
Algun punto cu a wordo treci pa dilanti ta entre otro; cu e scol a wordo pura pa bay completamente digital y no a tene cuenta cu e ‘randvoorwaarden’ manera por ehempel internet, e speed di internet y no prepara e docentenan pa e cambio aki. Con pa tuma pasonan pa corigi esaki of un ‘blended digitalization’ cu ta un combinacion di buki y digital ta preocupacionnan cu e Mandatario ta considera.
Tambe a elabora riba algun otro ayudo cu e scol tin mester. Minister Endy Croes a primiti den e simannan nos dilanti cu lo percura pa wak si tin espacio den presupuesto pa duna contenido na e peticionnan cu Colegio Nigel Matthew a duna y corigi preocupacionnan pa un miho calidad di educacion pa e hobennan cu ta atende e scol.
E Mandatario su deseo y empeño ta pa soluciona problematicanan mas tanto posibel, crea espacio pa trankilidad, paz y mehoracion den e tereno di enseñansa.

Gobierno Salud

Minister Rocco Tjon:
REUNION SUMAMENTE POSITIVO CU PAN AMERICAN HEALTH ORGANIZATION (PAHO)

ORANJESTAD –  Recientemente, Minister di Husticia y Asuntonan Social Sr. Rocco Tjon, conhuntamente cu DVG, Departamento di Asunto Social y diferente beleidsmedewerkers di Minsterio di Husticia y Asuntonan Social cu ta den e “steering committee” a reuni virtualmente cu varios miembro di diferente pais cu ta forma parti di Pan American Health Organization (PAHO). Durante e reunion aki a elabora riba e “roadmap” pa salud mental y trastorno di uso di substancianan adictivo y con por fortalece e sistema na Aruba y na mes momento hiba un miho practica pa inversion. PAHO lo sigui brinda pais Aruba e ayudo y e sosten den e vision cu lo wordo designa pa trato di e temanan aki, pa e periodo di 2021 te cu 2031.
 
E “roadmap” ta defini seis punto clave di atencion pa asina alinea mucho mas miho e trabounan entre e “stakeholders”, y ta sirbi tambe como e base pa asina involucra e sector publico, sector priva, organisacionnan, partners y expertonan tecnico entre otro.
E seis puntonan ta consisti di entre otro:
1. Leadership & Governance
2. Health Service Delivery
3. Health Workforce
4. Health Information
5. Medical Technologies
6. Health & Financing
 
E Mandatario a remarca cu, e seis puntonan clave aki, segun e “roadmap”, ta cuadra en realidad cu tur e puntonan cu tambe ta aparece den e MOU, cual a wordo firma entre e diferente instancianan y departamentonan na Aruba mes.  E Mandatario a añadi tambe cu PAHO mes tin fondonan disponibel pa trata e temanan aki, cual ta un bon noticia pa Aruba. A base di esaki, e comite a compromete pa manda e “needs assessment”, pues e lista di e necesidadnan pa Aruba, dentro di dos siman, di cual PAHO a indica di ta dispuesto pa colabora cu Aruba den cuadro di e proyecto aki.
 
Por ultimo, Minister Tjon a indica cu e vision aki lo wordo adapta den un plan di implementacion pa e dos añanan nos dilanti unda PAHO lo sigui cu e colaboracion cu Aruba pa cu esaki.  Tambe a gradici tur e miembronan di e “steering committee” di Aruba pa nan tremendo trabou den nan dialogo cu PAHO, cual a percura pa, den un tempo corto, nos logra un vision cu ta bay acapara e temanan aki te cu 2031. Dentro di poco lo tin un workshop y training pa e parti di implementacion di e diferente puntonan clave cual ta toca e partinan legislativo, tecnologico y financiero.

This will close in 0 seconds