Category: Noticia

Bon dia na tur presente. Awe henter Aruba ta di luto, for di diahuebs pasa cu Aruba haya e noticia cu nos Ruben Luis Garcia no ta cu nos mas, ta reina un enorme tristesa na Aruba. Tur cos a para un rato keto y e atencion tabata riba e noticia cu Aruba a perde un eminencia, un gran legendario. Rednan social tabata yen cu palabranan di danki pa recuerdonan, experiencianan bunita y palabranan di sosten na su famia, mensahenan di pueblo di Aruba, for di nos islanan ruman y tambe otro partinan den exterior. Na e momento cu e noticia a drenta, un profundo tristesa a reina den nos comunidad y mesora a realisa cu nos a perde un otro legendario, cu a laga un tremendo bashi aki na Aruba. Durante e ultimo dianan aki nos por a sinti cu e amor cu Aruba tin pa Ruben ta inmenso y esaki ta wordo confirma tambe awemainta na su despedida.

ORANJESTAD – siman pasa a tuma luga un conferencia organisa pa World Bank y otro organisacionnan internacional, den cual a trata e tema di preparacion y resiliencia di paisnan den region di Caribe den caso di calamidad of disaster y capacidad financierp pa atende cu esaki. Bureau Rampenbetsrijding Aruba (BRA) a atende e conferencia aki como parti di e delegacion di Aruba y como e instancia cu tin e responsabilidad pa prepara Aruba den caso di cualkier disaster. Den cuadro di esaki a tuma luga un excursion pa cual BRA a prepara un “Tier-2 commanding control” pa World Bank por haya un bista di e capacidad cu Aruba tin te cu aworaki pa responde den caso di un incidente.

Diabierna mainta October 28, for di 7:45am te cu 10:00am, John Wesley College na San Nicolaas a organisa un Beroependag informativo pa tur nan studiantenan cu por a scucha profesionalnan di diferente sector comparti nan experiencia. Cada un di nos a comparti nos experiencia di studio, trabao, y profesion actual. En total a duna informacion na klas 1,2 y 3 den sessionan di 45 minuut. Aki nos por a comparti y motiva e studiantenan pa nan prepara nan mes pa identifica kico nan lo kier studia pe den futuro pa asina nan cuminsa considera cual profiel nan lo kies na scol. A encurasha tur studiante pa siña enfoca riba nan studio, keda determina y persevera pa alcansa nan soñonan.