Nos t'ey pa Informa bo
Cu hopi alegria y ambiente awe nos ta habri nos temporada di Carnaval atrobe despues di 2 aña sin por a celebra manera custumber. Yessss, Carnaval 69! Covid a bin cu su retonan y a dicidi pa henter mundo otro, pero e aña 2023, SMAC ta sigura di pone ambiente, aki aya, riba’bou y den dje pa tur cu a haya falta di celebra carnaval!
Durante tratamento di Presupuesto 2023, Minister di Finansa a entrega un Nota di Cambio pa asina cambia e deficit di 25 miyon pa un surplus di 63 miyon florin cu ta ekivalente na 1%. Di e manera aki Aruba por cumpli cu condicionnan di supervision financiero y na Aruba como den Reino por tin e trankilidad y siguransa cu trabou serio ta wordo haci riba e tereno di finansa publico na bienestar di Aruba.
Simultaneamente cu e reunion pa atende presupuesto 2023 di pais Aruba a continua diahuebs mainta, den sala di corte e requisitoir den e caso Avestrus contra primordialmente Benny Sevinger tabata wordo lesa. Tur loke a keda presenta ta duna nos un bista riba un situacion hopi grave y di condena. Tin algun cos cu pa basta tempo ta conoci pero awe ora ta scucha tur cos, un tras di otro bo ta keda asombra con tin hende ainda por cana cabes na laira y sin ningun tipo di berguensa.
Den luna di oktober 2022 Aruba a ricibi 83,404 turista via nos aeropuerto. Un cresemento di 5.1% den comparacion cu luna di oktober 2019 unda Aruba a ricibi 79,389 turista. Locual a resalta den e raportahe tambe ta e recuperacion di nos mercado mas importante cu ta Estados Unidos cu a registra un cresemento di 4.7% porciento compara cu oktober di aña 2019, esaki ta representa yegada di 61,156 turista for di USA. Turismo ta sigui recupera, sigui crece y sigui surpasa nivelnan di aña 2019 cual sigur ta excepcional.
Recientemente Minister Maduro a tene un reunion regular cu CAFT pa atende e puntonan cu e supervision financiero di Reino Hulandes ta trece cune pa Aruba. Riba agenda tabata tin e Cambio di Presupuesto 2022, Presupuesto 2023, Landspakket, Gastonan di Cuido y Impuesto. Na comienso tambe a combersa riba e desicion di Conseho di Minister di Reino pa no duna Aruba un ‘Aanwijzing.’ Aki ta sigui un bista di e topiconan trata.
ARUBA- 11 november 2022. For di man di Minister di Turismo y Salud Publico, Minister Dangui Oduber y tambe docente di opleiding Bijzonder Opsporingsambtenaar mr Eddy Ras, diahuebs anochi 8 empleado di Dienst Warenkeuring en Hygiëne a ricibi nan diploma como Bijzonder Opsporingsambtenaar (BOA).
ORANJESTAD-Durante tratamento di presupuesto 2023, Minister Glenbert Croes a elabora riba e pregunta haci na su persona relaciona cu e proyecto di solar park na Aruba Airport Authority (AAA). Minister Croes a splica cu en realidad di punta di bista estetico, e proyecto aki ta uno bunita, ta duna sombra etc. Pero di punto di bista economico, e no tabata e mihor opcion pa ELMAR Aruba NV ya cu tabata mas barata pa cumpra electricidad di ELMAR cu for di e parke Solar di AAA.
ORANJESTAD – Diahuebs anochi a tuma lugar un ceremonia special na Surf Side Marina, caminda 8 empleado di Dienst Warenkeuring en Hygiene (DWH) a ricibi nan certificado di Bijzonder Opsporingsambtenaren (BOA) despues di a completa e opleiding Buitengewoon Agent van Politie.
ORANJESTAD: Recientemente profesor Luutsen de Vries tabata na Aruba na unda e la reuni cu Mandatario di Enseñansa. Profesor de Vries a wordo contrata pa yuda cu recomendacion number 11 di e “Doorlichting van het Arubaanse Onderwijsbestel”. Recomendacion 11 ta papia di nos leynan di enseñansa cu ta anticua esta e Landsverordening Kleuteronderwijs, Landsverordering Basisonderwijs y Landsverorderning Voortgezet onderwijs. Pa loke ta trata e Landverordening Hoger onderwijs mester wordo revisa y modernisa. Landsverordering Beroeponderwijs y Wet op Toezicht (WOT) di Inspectie Onderwijs no tin un ley existente. Profesor de Vries ta e trek e proyecto di modernisacion di nos leynan den Enseñansa como tambe lo traha e leynan cu no ta existi skirbi e “Memorie van Toelichting” como tambe tin e tarea pa modernisa tur e leynan existente.
ORANJESTAD: Dialuna mainta Minister Endy Croes, ex- MLB pitcher di ekipo Baltimore Orioles, Calvin Maduro hunto cu Charitable Foundation OACF den comunicacion y trabou estrecho cu Gobierno di Aruba a logra baha un container di 20 pia mas cu 50 mil Dollar na materialnan deportivo. Tanto material nobo y segunda mano di baseball, softball y algun di futbol. E materialnan a wordo aloca den warehouse y ekipo di deporte ta sorteer nan pa e siman entrante cuminsa parti a traves di ekiponan, organisacionnan di baseball y softball como tambe pa regala muchanan di menos recurso y muchanan cu ta practica deporte. E proyecto aki ta un colaboracion cu diferente instancianan internacional pa asina trece tambe material pa diferente deporte na Aruba. Minister Endy Croes ta gradici sr. Calvin Maduro, Charitable Foundation OACF y tur cu di un otro manera a haci e proyecto aki un realidad pa nos muchanan y deporte di Aruba.
