Nos t'ey pa Informa bo
ORANJESTAD: Dialuna atardi mandatario di Deporte a ricibi Seleccion di Aruba Triathlon cu a marca historia na Bermuda den e competencia di CARIFTA Triathlon, Aquathlon and Mixed Relay Championship 2022. Como muestra di aprecio y gradicimento pa nan excelente prestacion y logro e Dignatario a duna e tri-atletnan reconocemento den nomber di Gobierno di Aruba.
ORANJESTAD: Diabierna ultimo Minister Endy Croes tabata presente na Centro Deportivo Libertador Betico Croes pa e gran apertura di iF3 Functional Fitness Masters World Championship Aruba 2022
Diabierna Minister Endy Croes a ricibi bishita di director di Telearuba sr. Giovanni Kock en conexion cu Copa Mundial 2022 cu ta tuma luga di 20 di november pa 18 di december na Qatar.
ORANJESTAD: Diaranson anochi Minister Endy Croes tabata presente na Aruba Beach Tennis Open 2022 pa presencia e gran partido final den categoria di men singles entre Aksel Samardzic di Aruba y Antonio Miguel Ramos Viera di Spaña.
ORANJESTAD, Aruba – 17 di November 2022: Federacion di Ahedres di Aruba (FAA) a clausura nan Campeonato Nacional Femenino y Masculino, na nan cede na Royal Plaza Mall. Sake di honor a keda den persona di Sr Yair Lichtensztajn, yui di Adolf Lichtensztajn (dfm) cu por cierto tawata un gran colaborador di Federacion di Ahedres y tambe Sr John Raymond Croes, yui di Robert “Wewe” Croes (dfm) cu tawata e prome Arubiano cu a competi den un Olympiada Mundial di ahedres.
ORANJESTAD: Dialuna atardi den un esfera ameno Minister Endy Croes a ricibi atleta y coach di Tiger Taekwondo Academy cu a conkista diferente medaya den e prome Panamericano Infantil y Open G2 na cu a tuma luga den luna di october na Sogamoso, Colombia. E seleccion a logra un total di 13 medaya. Concluyendo Minister Endy Croes ta felicita y gradici nos atletanan pa nan excelente prestacion. Danki pa pone Aruba su nomber briya den exterior. Alabes ta gradici e entrenandonan sr. Teofilo Rodriguez y Jason Ridderstaat como tambe e mayornan pa sostene nan yiu den e deporte di Taekwondo cu boso deseo, disciplina, dedicacion y determinacion boso a logra. Masha Pabien cu boso excelente prestacion y logro. Nos ta orguyoso di boso!
Ayera anochi den Allegra Bistro situa den Courtyard by Marriott Aruba Resort a tuma luga e prome “Meet & Greet” di Arubaanse Voetbal Bond cu e Miembronan di Prensa. E tawata un anochi placentero unda cu President di AVB Sr. Randolf Lacle a habri e anochi dunando un palabra di bon bini y gradici e Miembronan di Prensa pa nan presencia. Sr. Lacle a introduci e 6 Miembronan di Bestuur cu ta Sr. Frans Dijkhoff, Sra. Rosemin Croes, Sra. Geetanjali Khemlani, Sra. Mildred Wever, Sr. Howard Hart y Sr. Albert Lake Jr. Sr. Lacle a informa cu aparte di bestuur, AVB tin su staf cu haci trabou nan diario y di cual desde januari di e aña aki Sr. Hubert Solagnier a bira e Secretario General di AVB.
ORANJESTAD: Den conferencia di prensa di diabierna ultimo Sjoerd de Vries a anuncia e gran apertura Aruba Open Beach Tennis Championships 2022. Presente na e ocasion tabata Minister di Deporte, Aruba Tourism Authority, Andrea Stutto di Italia un di e miho hungadonan di mundo y internacional ITF referee Massimo Morelli. Aruba Open Beach Tennis ta e evento deportivo mas grandi den Caribe. Bushiri Beach un biaha mas ta scenario di e torneo mas popular di mundo cu e aña aki ta conta cu participacion di 1200 atleta di 40 diferente pais cu ta batayando 1 siman largo pa gana premionan balora na e suma total di $60,000.00. Weganan ta cuminsa tur dia pa 9’or di mainta. Minister Endy Croes ta felicita sr. Vries organisado di Aruba Beach Tennis Open y tur cu di un of otro manera a contribui pa haci e torneo aki un realidad despues di 2 aña. Alabes mandatario di Deporte ta invita henter pueblo di Aruba pa bishita e campeonato di tennis mas grandi den Caribe. Exito na tur atleta cu e deseo, disciplina, dedicacion y determinacion boso ta logra.
ORANJESTAD: Dialuna atardi Minister Endy Croes tabata presente na aeropuerto internacional Reina Beatrix pa ricibi nos tri- atletanan femenino cu a regresa despues di a participa CARIFTA Triathlon & Aquathlon Championship 2022 cu a tuma luga na Bermuda. E hoben atletanan: Giovanna Wernet, Emma Gobert y Rebecca Jansen a conkista varios medaya durante e competencia. Den totalidad Aruba a logra un total di 10 medaya durante e dos dianan. Como pais Aruba a sali na di 3 luga di e competencia, esaki ta door di puntonan cu e ekipo acumula. Diamars den ora di atardi tri-atletanan masculino: Richard Sotelo, Christiaan Jansen y Jeon Fernandes ta regresa Aruba. Concluyendo Minister Endy Croes ta felicita y gradici nos tri-atletanan pa nan excelente prestacion y mayornan pa sostene nan yiu den nan deporte. Pabien cu excelente prestacion y logro. Nos ta orguyoso di boso!
ORANJESTAD: Diabierna atardi riba cancha di Denzel Dumfries di Cruyff Foundation na Jaburibari a tuma final di futbol femenino pa scolnan avansa den deporte escolar. E cuater scolnan Colegio Arubano, Colegio Nigel Matthew Aruba, EPB San Nicolas y La Salle College Aruba a bataya pa mira ta conkista e titulo maximo. Minister Endy Croes tabata presente pa duna sosten y apoyo na e futbolistanan den e final den Deporte Escolar 2022.
