Category: Husticia

Husticia

REORGANISACION DI INMIGRACION ARUBA A DRENTA SU FASE FINAL

ORANJESTAD – Recientmente, durante e celebracion di 53 aña di aniversario di Inmigracion Aruba como un organisacion, Minister di Husticia y Asuntonan Social Sr. Rocco Tjon, a indica cu pronto e reorganisacion lo keda cla, mirando cu hunto cu DRH ta trahando riba esaki. Den e plan di maneho di Ministerio di Husticia y Asuntonan Social, a priorisa aspectonan cu ta regarda personal. Den cuadro di esaki, diahuebs mainta a notifica e tres sindicatonan esta, SEPPA-TOPA-STA, cu lo inicia cu e “plaatsingsprocedure”. Esaki, despues cu recientemente conseho di Minister a aproba e ultimo formato di e structura di organisacion, manera a ser palabra cu e sindicatonan.

Husticia

A REUNI CU DIFERENTE DEPARTAMENTONAN DI HUSTICIA DEN CUADRO DI PROYECTO DI EDIFICIO EX-CODEMSA

ORANJESTAD – Dialuna durante dia, Minister di Husticia y Asuntonan Social Sr. Rocco Tjon a reuni cu e diferente departamentonan di Husticia. Manera a wordo anuncia algun luna atras, e proyecto caminda diferente departamento di Husticia lo bay muda pa e edificio di Ex-Codemsa, ta den pleno ehecucion. Den cuadro di esaki, a reuni cu Cuerpo Policial, Inmigracion, Bureau City Inspector y CEA, caminda a logra determina e necesidadnan concreto cu nan tin mester di dje, pa asina nan por ubica nan trahadonan. Pues un proyecto sumamente importante pa Ministerio di Husticia.

Husticia

Ministerio di Husticia y Asuntonan Social:
BRANDWEER ARUBA TA SIGUI CURSO PA CERTIFICA COMO INSTRUCTORNAN LOCAL

ORANJESTAD – Durante un siman di cursonan intensivo, Brandweer Aruba a cuminsa cu e proceso pa prepara seis miembro di Cuerpo di Bombero pa bira instructornan local di Brandweer. E curso aki ta wordo duna door di “Veiligheidsinstituut Nederland” y lo dura alrededor di un luna mas. Recientemente, e seis “bevelvoeders” di Brandweer Aruba a bula pa Curacao, caminda nan lo sigui ricibi e trainingnan necesario, pa por termina e curso. E curso aki ta wordo atendi hunto cu Cuerpo di Bombero di Curacao.

Husticia

A ENTREGA UN RELATO DI OCHO PAGINA NA PARLAMENTO TOCANTE BISHITA Y REUNIONNAN NA HULANDA

ORANJESTAD – Siman pasa, Minister di Husticia y Asuntonan Social Sr. Rocco Tjon a haci un biahe pa Hulanda, caminda a reuni cu diferente instancianan hudicial, Minister encarga cu Husticia y Siguridad como tambe Minister encarga cu “rechtsbescherming”; cual ta encarga cu e parti di “gevangeniswezen”. E meta principal di e biahe y e reunionnan aki tawata pa sera y amplia e cooperacion entre e diferente departamentonan. Tambe a enfatisa riba e importancia pa percura cu e cooperacion aki, specificamente riba e tematica di combatimento di criminilidad, por ta uno solido mirando cu hopi bes nos ta falta cierto experticio na Aruba, pa motibo cu esaki ta uno hopi caro. Pa e motibo aki, ta importante pa sera lasonan di cooperacion cu e diferente departamentonan aki na Hulanda, pa na momento cu un incidente pasa na Aruba, nos por conta cu e sosten di inmediato di e instancianan aki.

Gobierno Husticia Labor Noticia Politica Reino Social

Parlamentario Marco Berlis (MEP) ta papia di Ley di Ombudsman Part 2:
Oposicion encontra di un ombudsman na Aruba

Show y actuacion politico pero sin curason pa pueblo!!

Manera cu mi a bin ta bisa constantemente den pasado den mi betoog y articulonan di prensa, nos no mester haci mucho esfuerso pa pueblo por wak e realidad di AVP, MAS y ACCION 21. Nan mes ta revela unda nan interes y curason ta: sigur no pa pueblo! Nan mesun accionan ta papia pa nan mes y nan argumentonan pa no aproba e ley ta simplemente partidista y ridiculo. Un biaha mas nos por keda wak e postura anti-rubiano cu e partidonan di coalicion di AVP tin ora ta toca votamento di Leynan of solucionan concreto pa nos pais. Pa ocho aña largo AVP no a haci nada pa bin cu e Ley di Ombudsman y awor ta haci todo por todo pa stop esaki. Esaki ta comprondibel, ora nos por wak cu e partido tin un problema sistematico di corupcion, naturalmente nan no kier un ombudsman. Un ombudsman lo kiermen cu pueblo lo a denuncia masha tempo caba e corupcion y abuso cu cual nan a somete nos pais na dje.

E postura di oposicion pa defende cu nan no a vota CONTRA di e Ley, sino pa via di amienda 6 nan a haci’e, pasobra esaki lo mester a haci e Ley MEP-proof. Shonnan, e Ley aki ta e Defensor di pueblo, un ley cu lo yuda nos ciudadanonan. E proceso con ta scoge e Ombudsman ta haci’e uno completamente apolitico. Voorzitter di Raad van Advies, di Hof van Justitie y Algemene Rekenkamer ta bin cu tres candidato cu e perfil cu ta exigi den e ley aki. Despues di a scoge un persona, e mester pasa pa aprobacion di ⅔ di Parlamento. Con mas apolitico esaki por ta? Ademas tene na cuenta cu ora kier pres pa pone ⅔ di Parlamento pa retira e Ombudsman di trabao, bo ta entregando e minoria e poder pa stop esaki. Pasobra bo lo mester apenas 8 miembro pa stop e kitamento di e Ombudsman, mientras cu kizas 11, 12, ni 13 miembro cu ta e mayoria, no por haci nan trabao e ora. Naturalmente esaki mester tin su rasonnan extraordinario, pasobra e proteccion di e trabao di e Ombudsman tambe ta regla den articulo 6 di e Ley aki. Semper camuflando nan miedo pa pais Aruba tin mas Institucionan independiente por tin mas control riba gobierno, pasobra nan no lo kier esaki si nan drenta gobierno algun dia.

E actitud constante Anti-Rubiano di oposicion no ta desconoci y e patronchi aki ta keda ripiti su mes y nan hipocrecia ta evidente. Tur locual ta importante pa Aruba, nan ta vota encontra. Y esaki tambe mi a bin ta subraya continuamente;

• Ora cu Fase a wordo presenta, AVP a vota ENCONTRA!
• Ora cu a presenta Loonsubsidie den crisis, AVP a vota ENCONTRA!
• Ora cu a mester a vota pa RWZI por a haya un plan structural di mantencion y un planta nobo pa soluciona e situacion actual, AVP y MAS a vota ENCONTRA!
• Ora cu mester a vota pa Aruba haya su propio Ley di Ombudsman hancra den nos constitucion, como ultimo pais den Reino cu no tine ainda, nan TUR a vota ENCONTRA!
• Ora ta vota continuamente di e forma Anti-Rubiano aki semper nan ta vota ENCONTRA interes general. Pesey e ta incomprendibel con hende por sigui vota pa partidonan cu ta puro show dilanti camera, pretendiendo di papia bunita, gaña den eleccion cu lo practica un politica moderno y nobo, sinembargo ora di vota pueblo por wak lo contrario!
Ta masha comico tambe cu AVP cu ta bayendo di escandalo pa escandalo di corupcion, awor kier tilda cu nan kier “protege Aruba di MEP” y kier haci e ley MEP-proof. No pueblo, ta AVP-proof nan kier haci’e! Si no tin Ombudsman mihor pa AVP y MAS, nan no kier e Ley aki y nunca a worry pa bin cu ne. Nan no kier pa bini mas control riba gobierno pesey nan a vota CONTRA! Como Parlamentario di fraccion di MEP mi no tin nada di sconde! Mi ta pro-Ombudsman! Partido MAS ta den e mesun boto! Hopi gritamento y show, pero ora di vota nan ta tene man cu AVP y Accion-21, e coalicion di AVP, parando cu un postura anti-Arubiano y contra progreso di nos pais!