Minister di Cultura Xiomara Maduro durante Homenahe na Etty Toppenberg Etty ta un di nos herencianan cultural cu a gana respet y aprecio di nos pueblo Arubano
Etty su pasion pa musica y amor pa humanidad a trece riba e idea pa deleita e publico di nos hendenan di edad respeta tur diabierna gratuitamente na Djiespie’s Place. Segun Minister Maduro cu hopi amor Etty ta brinda alegria den curason di nos hendenan di edad y laga su publico recorda momentonan bunita cu su cancionnan. Etty ta pone hopi ambiente riba diabierna atardi na Djiespie’s Place, mientras su publico ta move e curpa riba e ritmo di su musica. Un bunita acto di Etty pa asina nos adultonan mayor tambe por tin un luga pa bin socialisa y disfruta di e fin di siman. Su publico ta stime masha hopi.
Etty ta un di nos herencianan cultural cu a gana respet y aprecio di nos pueblo Arubano. Ela dedica su bida representando nos musica y cultura cu placer y dedicacion. Dios a dune un talento y ela regala pueblo di Aruba su cancionnan y asina enrikese e cultura musical di Aruba. Etty su contribucion na cultura di Aruba ta hopi grandi. Cu su bos unico e ta transmiti mensahenan pa alegra y consola hopi curason.
Minister di Cultura a trece dianti cu na e ocasion special aki Go Cultura Foundation, UNOCA, DCA y Ministerio di Cultura a uni pa brinda Etty e anochi special aki. “Un homenahe na Etty”, brinda cu hopi cariño, amor y calor di nos pueblo Arubano pa reconoce Etty su boluntad, añanan di trabao, creatividad, esfuerso y dedicacion. Ademas e mandatario a gradici un y tur cu a traha duro pa haci e homenahe aki posibel.
Minister Maduro a sigui trece dilanti cu e anochi aki pueblo di Aruba ta para keto y reflexiona riba tur locual Etty a haci pa Aruba, atraves di su profesion y talento musical. A gradici Etty pa inspira, motiva, alegra y consola e curasonan Arubiano por medio di su musica. Y tambe a gradici Etty pa su contribucion den formacion di nos hobennan como maestro di scol.
