Parlamentario Hendrik Tevreden (MEP): E problematica di adiccion lo conoce un solucion e lunanan nos dilanti

600 mil florin pa atende cu adictonan ambulante

ORANJESTAD – Dialuna durante conferencia di prensa di gobierno, Minister di Husticia y Asuntonan Social Rocco Tjon a anuncia cu Conseho di Minister a aproba 600 mil florin pa un proyecto pa atende cu e adictonan ambulante. Locual esaki ta nifica ta, cu lo bay bek na purba saca e adictonan for di caya pa hibanan rehabilita.

 

Un proyecto cu nos tawata conoce den pasado y cu tin hopi aña bogando pa e wordo reactiva, mirando cu esnan ambulante no tawata haya suficiente ayudo. Cu hopi satisfaccion nos ta aplaudi Minister Tjon pa cu e logro aki mirando cu e problema aki lo haya su debido atencion y nos ta spera cu e lo ta na un manera duradero.

 

Bemoeizorg ta e nomber

Bemoeizorg ta e nomber cu ta wordo uza, cual antes tawata street corner worker. Pa esnan cu ta corda sr. Pedro ‘Bito’ Wilson tawata un di e street corner worker nan cu a impacta hopi cu su trabou e tempo ey. Awor lo bay emplea 5 persona capacita cu lo bay dedica na e proyecto aki y nan lo percura pa acerca e adictonan ambulante. Nan lo percura pa cada un cu kier wordo ubica den un di e centronan haya e oportunidad pa recupera y asina baha e cantidad di adictonan riba caya.

 

Lo renoba cambernan na Centro Colorado

Cambionan infrastructural necesario tambe lo wordo haci pa asina ubica e clientenan aki y dunanan e debido atencion. Na comienso lo haci uzo di ex-SAMBA, e centro na Meiveld, pero segun e plan a aloca Awg 100 mil pa renoba 2 camber na Centro Colorado. Unabes e cambernan aki ta cla, lo tin un total di 16 pa 24 cama na unda e adictonan aki por haya ayudo y cuido profesional. Tambe lo tene na cuenta tur otro necesidad di e adictonan unabes cu kita nan for di riba caya. Pa cu esaki lo tin tur material disponibel pa asina por atende y provee pa e adictonan aki efectivamente. Parlamentario Tevreden kier felicita Minister Rocco Tjon y su ekipo completo pa haci uzo eficiente di e fondonan cu parlamento a aproba pa asina realmente dedica esaki na e gruponan cu mas tin mester. Mes momento ta spera cu lo mira un aumento den otro presupuesto, pa por mantene e trabounan akinan intacto. Ta dificil pa elimina e problematica di adicto ambulante, pero ta importante pa cuminsa tuma paso pa logra minimalisa esaki. Pasobra e adicto tambe merece un oportunidad y ayudo.