Prome Minister Evelyn Wever-Croes: NO TA PRUDENTE PA INTRUDUCI BTW ENTRANTE 1 DI JANUARI 2023

Diahuebs 18 di augustus atardi durante conferencia di prensa extraordinario, Prome Minister Evelyn Wever-Croes hunto cu Minister Ursell Arends a anuncia cu no lo continua cu e introducion di BTW per 1 di Januari 2023 manera ta ser proponi den e landspakket.

 

Prome Minister a splica cu Reforma fiscal ta parti di un di e acuerdonan haci cu Hulanda den cuadro di e landspakket. Un parti di e Reforma Fiscal ta e BTW.  Den cuardo di esaki Departamento di Impuesto y como tambe Prome Minister, a reuni cu gremionan y a scucha preocupacion di gremio comercial, sindical y di comunidad en general riba e introduccion di un BTW. E preocupacion principal, Prome Minister a expresa, ta e efecto inflatorio di esaki pero tambe e preocupacion di comercio ora a indica cu lo no bay baha BBO pa despues bin cu e BTW. Tur esaki lo causa un efecto inflatorio aun mas halto.

 

“Nos a haci nos calculacion di e efecto inflatorio di e BTW y en bista di e guera di Ukraina y su efecto aki na Aruba, nos a yega na e conclusion cu no ta prudente pa introduci e BTW per 1 di Januari”, Prome Minister a duna di conoce.

 

Despues di consulta cu Minister di Finansas y su ekipo, a tuma e decision cu no ta sigui cu e plan di e BTW di 6-14%. Sinembargo e necesidad financiero si ta keda y p’esey ta contemplando pa na luga di e BTW introduci un aumento di BBO cu 1-1.5%. A haci calculacion di e BTW y e aumento di BBO y e resultado ta mustra cu e BTW ta casi 4 biaha mas halto cu si bo hisa e BBO. Banda di esaki pa compensa e aumento di BBO, ta contemplando tambe pa baha e impuestonan riba salario pa pensionadonan pa asina nan por atende cu e gastonan cu ta aumenta. Tambe tin pensa di reduci e tarifa den winst belasting di companianan. “Pues mirando e efecto di e guera di Ukraina, nos ta haya cu no ta prudente pa awor bin cu e BTW”.

 

Prome Minister a duna di conoce cu Gobierno cu e situacion na Aruba ta sigui dificil mescos cu henter mundo door di Covid, un pandemia devastador cu casi a kibra nos economia. Nos turismo berdad a cuminsa crece pero no a yega 100% ainda, nos economia no a yeg’e ainda tampoco. Nos ta casi di yega e turismo di prome cu pandemia.

 

Y riba esaki, nos ta sufriendo tambe e efectonan secundario di e guera na Ukraina. Prijs di crudo y di gasolin internacional a subi, tur producto cu nos ta importa a aumenta internacionalmente. Awa y coriente tambe a aumenta temporalmente y no ta na Aruba so sino henter mundo ta mirando e desaroyo aki. Hulanda ta pasando den e pio inflacion den e 50 añanan, Merca ta papiando di un recession. E guera di Ukraina tin un efecto grandi pa henter mundo.

 

Banda di esaki tambe, nos tin un debe hopi grandi tambe cu nos a sali di covid cu ne. E debe di Awg 900 miyon cu Aruba a presta di Hulanda. Gobierno ta buscando alternativanan pa e gastonan halto di awa y coriente. Gasolin a baha caba y pa awa y coriente lo mester bay den direccion di energia alternativa pa no depende di fuel.

 

Gobierno ta sigui baha gastonan di Gobierno drasticamente. Ta cortando den gastonan di goederen en diensten pa varios aña y Aruba ta e pais cu e gastonan aki mas abou den region. Asina mes Gobierno ta sigui baha nos gastonan y ta percura tambe pa cobra e impuesto cu mester cobra Gobierno ta hacienda lo posibel pa yega na e deficit cu mester y paga debenan di pais Aruba.

 

Gobierno lo sigui den dialogo cu gremionan y Hulanda pa determina y yega exactamente con ta bay bridge e gap cu nos ta den aworaki. Hunto lo sigui traha pa yega na un solucion hunto cu participacion di e gremionan y e profesionalnan cu ta e ekipo di Minister di Finansas.

 

Na final di e conferencia di prensa, Prome Minister Evelyn Wever-Croes a duna un mensahe general pa Aruba y oponentenan.  “Nos a ripara cu nos oponentenan politico ta contra tur cos. Mi por imagina cu esey ta un estilo di hiba oposicion. Hasta nan ta contra cosnan cu ta bon y necesario pa nos pais. Pero loke mi no ta di acuerdo cu ne ta cu nunca nan ta bin cu un solucion. E unico solucion cu nan ta bin cu ne ta pa lanta pueblo y baha Gobierno. Mi ta pidi oponentenan pa aworaki, Aruba por conta riba tur hende. Aruba tin mester di nos tur, di Parlamento, oponentenan, gremionan etc. Nos ta pasando den e dos crisisnan di mas pisa cu mundo a yega di pasa aden. Pues aworaki politica senciyo, politica barata no ta bay yuda Aruba bay dilanti. Bin cu bo solucionnan y hunto nos por bay traha na hiba nos pais padilanti”.