Minister Maduro ta felicita Fundacion Mi Cutisa pa organisa un charla riba e trayectoria di Rignald ‘Doble R’ Recordino
ORANJESTAD, Aruba
Un analisis di dr Rene Rosalia riba 50 aña di desaroyo musical
Den e aula di Universidad di Aruba, Fundacion Mi Cutisa a organisa un charla riba e trayectoria musical di Rignald ‘Doble R’ Recordino. E charla a wordo duna pa dr. Rene Rosalia kende como un antropologo na hermana isla Corsou a investiga e trayectoria musical di Doble R. Durante e presentacion dr. Rosalia a splica riba e nificacion di e trabao musical y balor literario di Rignald Recordino su cancionnan.
Cantica cu contenido y sabiduria popular
Den su trayectoria ‘Doble R’ a produci mas di 500 composicion. Den cada cantica un cuenta cu ta conta riba aspectonan social di nos sociedad, ta haya bida y ta sirbi di enseñansa popular. Asina por aprecia un variedad grandi di cantica dedica na e hende muhe, di cual e cantica ‘Ta muhe ta manda mundo’ ta uno hopi popular. ‘Shell Wel Wel’ ta un otro cantica popular cu ta conta riba e yegada, estadia y despedida di refineria Shell na Corsou y ta mustra riba e abusonan haci y nan efecto riba e Pueblo di Corsou. E cantica ‘Tula Warda’ tambe ta uno cu e mensahe pa nos ta consciente di nos balor como Pueblo y pa nos no sinta bringa otro. Tin e cantica ‘Redologia’ tambe cu e mensahe ta pa tur hende keda leu di redo. Den hopi cantica sr. Recordino ta manda e mensahe di sabiduria cu Rey Salomon a laga atras. E aña aki Rignald Recordino mes ta publica un buki di su historia musical cu e letranan di tur composicion cu ela publica.
Recordino ta siña nos aprecia Papiamento
Cu su piesanan sr. Recordino a siña nos aprecia e uzo di nos idioma natal Papiamento y mantene e interes den locual ta nos custumbernan. Den su obra ‘Esta un dushi lenga,’ Recordino ta describi Papiamento como un idioma creol cu ta hopi interesante, excitante, potente, suave, dushi, bunita, tonal, ritmico, poetico, humoristico, romantico, dramatico, facil, agradabel, flexibel, apreciabel y cu un gramatica logico, moderno y facilito. Papiamento ta completo y pesey ta bale la pena pa nos cuid’e y ta orguyoso semper di nos lenga materna.
Ta gradici Fundacion Mi Cutisa pa nan aporta na conocimento popular
Minister Maduro ta gradici Fundacion Mi Cutisa pa a organisa e tremendo charla aki unda e fundacion ta aporta na e conocimento popular di nos Pueblo. E musica y e historia tras di cada cantica di ‘Doble R’ ta algo unico y ta bale la pena pa wordo conta. Masha danki Fundacion Mi Cutisa y dr. Rosalia pa laga Aruba haya sa mas di e artista, genio literario y musical Rignald Recordino cu ta deleita nos cu su obra nan musical sin igual.
