ARUBA TA CONOCE SU PROME CASO POSITIVO DI MONKEYPOX

ORANJESTAD, Aruba

a keda confirma e prome caso di Monkeypox na Aruba. DVG a informa cu ta trata di un residente cu no tin historia di biahe recientemente. E motibo aki ta pone DVG conclui cu e contagio a tuma luga riba nos isla mes. Addicional na e prome caso positivo aki tin tambe un caso sospechoso cu ainda ta bou investigacion.

 

Pesey ta bon pa recorda kiko e sintomanan di Monkeypox ta. Despues cu un persona wordo infecta cu Monkeypox, tin un tempo di incubacion cu ta entre 1 pa 2 siman, aproximadamente. E persona cu a infecta por cuminsa presenta sintomanan di griep manera keintura, dolor di cabes y di curpa, cansancio y kliernan hincha. Entre 1 cu 3 dia despues di e keintura, ta desaroya e tipico rash cu ta spotnan plaat y cora, cu despues ta bira blaarnan cu likido cu ta yena cu poes. E rash por aparece na cualkier parti riba e curpa, pero principalmente na e cara y despues ta expande na otro parti di curpa, incluyendo plant’i man y di pia; y tambe rond di area genital of anal.

 

E blaarnan por haci dolor y grawata hopi. Algun persona por tin un of dos blaar mientras otro por tin hopi. E blaar ta keda infeccioso te na momento cu e haya casca, esaki cay y un cuero nobo nace. Esaki por dura algun siman pa cual motibo e persona infecta mester keda isola pa proteha otro.

 

Sintomanan di Monkeypox ta:

➡️Keintura

➡️Dolor di cabes

➡️Cansancio

➡️Kliernan hincha

➡️Rash

➡️Blaar cu pus

 

 

DVG tambe a informa cu pronto Aruba lo ricibi for di RIVM Hulanda un cantidad limita di vacuna pa yuda proteha contra e virus di Monkeypox. E vacunanan lo bay ta disponibel pa e grupo di riesgo mas grandi segun instruccion y maneho di Hulanda. Pa medio di dunadornan di cuido y specialistanan ciudadanonan cu ta cay bou di e grupo di riesgo lo wordo yama pa ricibi nan vacuna si nan ta desea esaki. DVG ta traha cu algun organisacion pa hunto yega na esnan mas na risico.

 

Monkeypox ta hopi contagioso. Pesey pa preveni di keda contagia ta recomenda pa evita di brasa, sunchi, caricia, mishi cu blarnan riba e curpa di un persona infecta of tene relacion sexual. Contact bo dokter di cas, si bo tin algun sintoma.