Prome Minister Evelyn Wever – Croes: A REUNI CU REPRESENTANTENAN DI SUPERMERCADONAN CHINES ENCUANTO POSIBILIDAD PA REDUCI PRIJS DI COMESTIBEL

ORANJESTAD – E siman aki Prome Minister Evelyn Wever – Croes hunto cu coleganan Minister Endy Croes y Minister Rocco Tjon, a reuni cu representantenan di supermercadonan Chines aki na Aruba. Motibo di e reunion tabata pa delibera aumento drastico di prijsnan, y pa mira con hunto por reduci e prijsnan. Banda di e tema aki a trata otro retonan cu e comunidad Chines ta enfrenta cual ta bay atende cu cada uno, Prome Minister a informa.

Di parti Gobierno na e representantenan di supermercadonan Chines, e peticion tabata con por logra baha e prijsnan pa un periodo, pa pueblo por sinta poco alivio ora di cumpra comestibel.

Prome Minister a splica cu no ta e grupo di supermercadonan Chines so ta impacta e prijs, pesey ta tene cuenta cu e fleta y esnan cu ta bende por mayor.

E reunion aki tabata e prome reunion di un serie di reunion. Siguientemente lo invita otro supermercadonan grandi y esnan cu ta bende por mayor, pa atende cu e tema aki.

Lamentablemente, mientras cu ta Aruba ta recuperando di e efectonan di e pandemia di covid, e guera na Ukraina a inicia cu tambe tin un impacto mundial. Paisnan grandi rond mundo manera Merca, Inglatera y Hulanda a conoce inflacion cu nan no a mira desde añanan 80. Sinembargo tin tur fe y confiansa cu ta bay sali afo. nos economia ta recuperando y ta spera cu otro aña lo ta bek na e nivel di prome cu Pandemia. Pero mientrastanto, mester alivio pa pueblo pa loke ta aumento di prijs cual ta locual Gobierno ta deliberando, Premier Wever – Croes a enfatisa.

Por ultimo, Prome Minister a bisa cu e reunion a bay den bon ambiente, a scucha otro su  preocupacionnan, y nan a compronde nos preocupacionnan. ‘Lo sigui den dialogo pa por logra baha prijs y crea alivio pa ciudadanonan di nos Pais.’