Parlamentario Marco Berlis (MEP): Un famia fuerte ta un comunidad fuerte

ORANJESTAD, Aruba

Nos famianan ta e cos di mas importante den nos bida. Expertonan a observa cu den tur sociedadnan cu nan a studia, famia ta hunga un rol crucial den e exito di individuonan. E influencia cu famia tin riba muchanan chikito por dura henter nan bida. Pesey famianan saludabel ta e fundeshi di un comunidad fuerte y saludabel.

 

Relacionnan di famia ta establece e fundeshi di futuro relacionan

E ser humano ta un criatura social. Nos ta diseña pa conecta y pa florece den relacionnan fuerte cu otro. E mucha su prome relacion ta cu su mayornan. Den su prome añanan, e mucha ta desaroya un conexion fuerte cu su mayornan. E conexion aki ta forma e perspectiva con nan ta wak nan mes y otronan. Un relacion fuerte entre e mucha y mayornan ta yuda desaroya un sentido di seguridad den nan. E calidad di e relacion intimo aki entre e mucha y mayornan lo influencia e mucha su habilidad pa forma y mantene relacionan ora e bira un adulto. Si e relacion aki ta fuerte, e mucha probablemente lo forma relacionan importante exitosamente.

 

Famia por cambia e desaroyo cerebral di un mucha

Un mucha su experiencianan for di un edad trempan ta establece un fundeshi fragil of fuerte den su comportacion, siñamento y su salud. Pa muchanan mas chikito, famia ta e lugar unda nan ta experiencia mayoria di nan experiencian y e mayornan ta nan prome maestronan y ehempel principal pa sigui. Mayornan responsabel, yen di amor, atencion, y un experiencia familiar positivo ta contribui na e desaroyo saludabel di e arkitectura di e mucha su mentalidad. Un famia saludabel cu ta lanta nan yiu bon ta wordo asocia cu un miho regulacion emocional, obediencia, studiamento academico, competencia social y resiliencia.

 

Famia por yuda establece un bon salud mental pa e mucha

Durante adolescencia, peer pressure ta cuminsa kita e influencia di e mayornan, sinembargo e forsa di e famia ta sigui hunga un rol importante den e formacion di e hoben su desaroyo. Ora tin un famia fuerte cu relacionan postivo, esaki ta wordo asocia cu nivelnan mas abao di depression y delinciencia bao hobenan. Problema psikologico, mal comportacion y depresion bao hobenan ta wordo reduci significantemente cu e apoyo di mayornan. Nivelnan modera di control y monitoreo tambe ta mustra di yuda preveni un comportacion asocial bao nos hobennan. Estudionan di profesionalnan tambe ta mustra cu bon tradicionan familiar ta yuda e hobennan forma nan sentido di identidad y ta lanta nan confiansa propio. Lasonan familiar positivo tambe ta yuda e hoben pa por lidia cu momentonan di crisis y otro tipo di problemanan. Sinembargo, relacionan familiar negativo den un seno familiar cu tin problema, por afecta un hoben su comportacion negativamente. Ademas esaki por afecta negativamente nan salud mental y social como adultonan.

 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!