Parlamentario Shailiny Tromp-Lee (MEP): Premio Excelencia den Deporte tin un balor multiple

ORANJESTAD, Aruba

Diasabra ultino, dia 20 di augustus 2022, a tuma lugar e anochi di gala pa loke ta trata Premio Excelencia den Deporte. Un anochi cu 141 nominado y caminda a anuncia e 22 atleta ganador. Banda di a ricibi un plakaat, e ganadornan a ricibi premio efectivo. Un anochi sigur cu a impacta e nominadonan y nan famia.

 

Premio Excelencia den Deporte sigur tin balor multiple. E ta un balorisacion pa e esfuerso, determinacion, disciplina y resultado di un atleta. E ta un un simbolo di orguyo pa e atleta y su famia. E ta fungi como un estimulo pa e propio atleta y pa otronan cu ta mira su trayectoria keda premia. E ta un manera pa genera fondonan cu den e mundo deportivo semper ta di hopi balor pa cu formacion di e atleta. Mediante e premio aki nos por uza e nominado y ganadornan como rolemodel pa nos mucha y hobennan. Mas cu tur cos nos ta pone nos atletanan cu a destaca den luz positivo y festivo. Pa es motibo aki mes mi ta contento cu Gobierno a dicidi pa continua cu otorgacion di e premio aki y cu a dicidi pa haci’e pa e añanan 2019 y 2021 cu door di Covid no tabata posibel. Sigur un felicitacion ta na su lugar na tur e nominado y ganadornan.

 

Durante e anochi di gala aki tambe a keda reconoci 10 baluarte di deporte pa nan aporte valioso na deporte of pa nan resultadonan impactante den e ramo di deporte cu nan ta practica. Mas cu claro un felicitacion tambe ta bay na e baluartenan cu a keda reconoci durante e anochi aki, kendenan ta: Glenda Croes-Tromp, Cecilia Balentin, Eddie Daou, Mario Maduro, Cado Kock, Dolfi Werleman, Henk Arnold, Roly Croes, Dechi Bislip y Dochi Lee.

 

Deporte y arte ta vehiculonan importante den e formacion total di nos mucha y hobennan. Nos ta crea lidernan pa mañan cu talentonan creativo, cu e habilidad pa “think outside the box” y ta forma personanan cu por traha mihor den team, segun structura y cu disciplina y determinacion. Sin laga afor cu e habilidad pa comunica mihor y funciona segun un plan. Mi ta kere firmemente cu deporte y arte mester forma parti structural di e formacion total di nos hendenan. Un manera pa garantisa esaki ta door di hacinan accesibel pa un y tur. Esaki sigur ta bira realidad si nan ta forma parti fiho den e curiculo di nos scolnan.