Inicio di e di dos programa di “BeYourOwnBoss” Fall course
ORANJESTAD, Aruba
Un total di 43 participante a cuminsa cu e “BeYourOwnBoss” fall course 2022. En total tabata tin 78 registracion, unda cu un biaha mas, ambos localidad na Oranjestad y San Nicolas a yena nan cuponan por completo.
E programa “BeYourOwnBoss” ta un curso presenta pa Qredits Aruba cu e meta pa educa y prepara e cursistanan pa ta un empresario exitoso den futuro. Qredits ta conoci pa su “micro financing” di empresanan existente y tambe start-ups, y tin un trayectoria di yuda empresarionan cu nan negoshi.
“BeYourOwnBoss” lo ofrece e cursistanan mas conocemento di e mercadeo, con pa skirbi un plan di negoshi y plan financiero y tur e rekisitonan cu ta necesario y importante ora di habri un negoshi y maneha esaki apropiadamente. Den pasado mas di 200 persona a finalisa e curso exitosamente y a ricibi nan certificacion.
E curso a cuminsa dia 23 di Augustus y lo termina dia 13 di October. Lesnan lo wordo duna riba diamars y diahuebs di 6:30 pa 9:00 di anochi y lo wordo ehecuta na Colegio EPI y na EPB San Nicolas. E materia lo wordo duna door di docentenan Mr. Jeandré Hessen y Ms. Twyma Van der Biezen.
Minister di asunto economico, comunicacion y desaroyo sostenibel, Geoffrey Wever ta contento di por continua e colaboracion entre gobierno di Aruba y Qredits Aruba pa por haci e curso aki mas accesibel. E mandatario ta desea tur e cursistanan hopi exito y perseverancia pa finalisa e curso exitosamente!
