PREMIO EXCELENCIA DEN DEPORTE A RECONOCE SR. RICARDO ‘CADO’ KOCK COMO BALUARTE DEPORTIVO 2021.

Oranjestad: Un otro persona cu a ricibi e reconocemento di Baluarte Deportivo ta Sr. Ricardo ‘Cado’ Kock cu sigur no ta desconoci den e mundo di drag race na Aruba. For di aña 1982 sr. Kock ta ‘driver’ di Big Joe Racing Team. E nomber di ‘Big Joe’ cu su ‘driver’ Ricardo ‘Cado’ Kock ta na honor di sr. Jose Maria ‘Joe’ Kock (Q.E.P.D.) cu ta hopi conoci den e mundo di drag na Aruba y Caribe. Tempo sr. Jose Maria tabata na bida, tur hende tabata yam’e ‘Big Joe’, pasobra e tabata un persona hopi grandi di estatura como tambe den su forma di ta. For di aki a nace e nomber di e racing team. Big Joe Racing Team su prome auto tabata un Chevy Nova cu a wordo cumpra 24 di februari 1982. E Chevy Nova a haya e nomber di ‘Mr. Big Joe’. E prome careda cu Big Joe Racing Team a participa aden tabata durante apertura di e Pista di Palo Marga na aña 1983 dia di aña di La Reina. Na aña 1985 ‘Mr Big Joe’ cu su ‘driver’ Ricardo ‘Cado’ Kock a sa di saca cara di Aruba den grandi ora a conkista e titulo maximo di e prome careda internacional di ‘Pan American Race of Champs’ na Aruba. Por cierto e Chevy Nova aki ta activo te cu dia di awe y ta hopi popular y gusta cerca e gran fanaticada di drag race aki na Aruba. Na november 1989, e ‘transmission’ di e auto a explota y aki ta caminda cu Big Joe a keda for di careda pa un periodo di casi 1 aña. Big Joe racing team cu su ‘driver’ Cado Kock a sa di conkista varios titulo durante di tur su añanan di existencia y tur esaki danki na un grupo grandi cu semper a para tras di e ekipo completo. Awendia Big Joe Racing Team ta un di e ekiponan di mas grandi y admira di Aruba.
Premio Excelencia den Deporte y Minister Endy Croes ta felicita sr. Ricardo ‘Cado’ Kock cu reconocemento Baluarte Deportivo 2021 danki pe dedicacion amor y aporte den e deporte di drag racing.