Presentacion Desaroyo di Arkeologia Subacuatico na Aruba 15 di september na MANA

E ciclo di charla “Hoyanan di Herencia Cultural Subacuatico na Aruba” ta continua cu un presentacion sumamente interesante di arkeologo na MANA (Museo Arqueologico Nacional Aruba) drs. Raymundo Dijkhoff. MANA ta invita tur esnan interesa pa ta presente diahuebs dia 15 di september awor di 7:30 pa 9:00 di anochi den su auditorio pa haya sa mas di e desaroyo di arkeologia subacuatico na Aruba.

E presentacion na Papiamento ta forma parti di un serie di tres charla. Studiante di arkeologia Gendra Laclé a inicia e ciclo cu e prome charla dia 4 di augustus pasa cu su presentacion tocante di recursonan arkeologico subacuatico na Aruba. Den e di dos charla den cuadro di arkeologia subacuatico na Aruba, arkeologo Raymundo lo trata e formanan cu nos isla a atende cu e topico aki.

E serie di charlanan aki ta conecta cu e planificacion pa realisa e ratificacion di e Convenio 2001 di UNESCO relaciona cu e “Proteccion di e Patrimonio Cultural Subacuatico”. Esaki ta sumamente importante pa sigura e preservacion di nos herencia cultural subacuatico. E ratificacion ta proyecta pa fin di 2022 /cuminsamento di 2023.  Reino Hulandes lo ratifica e Convenio aki cu lo bira vigente pa tur pais den Reino. Den e Convenio ta indica con, riba nivel nacional y internacional, tin cu trata herencia cultural subacuatico den cada pais y entre paisnan cu a ratifica e convenio aki.

Ademas di atencion pa e convenio di UNESCO 2001, arkeologo Raymundo Dijkhoff lo enfoca riba desaroyo di decadanan pasa cuminsando di añanan 40. E lo elabora riba maneho prome y despues di 1999.  Tambe atencion lo ser poni riba con den diferente decada tabata atende cu arkeologia subacuatico, manera buscamento di tesoro, coleccionista priva, pasa tempo y contactonan cientifico.

Pa Aruba duna balor, preserva y maneha su herencia cultural subacuatico ta importante pa sa kico ta e desaroyonan actual, kico a sosode den pasado y con nos mester anda cu futuro di sitionan y obhetonan arkeologico subactuatico.

Pesey acudi na e presentacion interesante aki y reserva e fecha! Entrada ta gratis! En conexion cu trabounan di construccion ta pidi encarecidamente pa hasi uzo di e entrada na Emanstraat y drenta via e hardin.