MINISTER ENDY CROES A HIBA PALABRA DURANTE E ‘YOUTH ATHLETE EVENT’ ORGANISA PA ATIA.

ORANJESTAD: Diabierna ultimo Minister Endy Croes tabata presente na Marriott Aruba Resort & Stellaris Casino pa e prome ‘Youth Athlete Event’ organisa na ATIA. Un atardi ameno unda cu mas di 450 studiante/atleta a participa e conferencia LIDERA cu Trent Shelton, un ex hungado di NFL, awendia un di e miho orador di mundo y autor di e bukinan ‘The Greatest You’ y ‘Straight up’ cu ta enfoca riba con bo proposito ta tambe bo poder.

Na inicio di e evento, director di ATIA, sr. Henriquez a hiba palabra sigui pa e mandatario di Deporte cu a expresa su gratitud na ATIA cu a dedica un atardi asina special na nos atletanan hoben. Minister Endy Croes a sigui bisa esnan cu conoce sa cu deporte ta core den su benanan. E mandatario a sigui bisa mi tambe a practica deporte riba nivel di seleccion pa hopi aña, a representa Aruba na hopi ocasion y pesey ora e mira caranan hoben e ta sinti loke e atletanan ta sinti. Nos ta sostene tipo di eventonan asina, evento cu ta trece colectividad di un cantidad di hoben cu sea ta practica deporte ya caba riba nivel di federativo / competitivo of ta den e trayecto pa drenta den un di e federacionnan pa asina practica deporte cu ta crea lider como tambe ta crea tambe un miho persona pa nos sociedad.

Prome cu Trent Shelton a subi e scenario, un panel di Aruba mes consisti di (ex) atletanan; Devah Leenheer, Jordy Groters, Elliott Loonstra y Nicole Hoevertsz, a elabora riba nan experiencia di bida como atleta y awor formando parti di e industria di deporte. Cada uno a comparti nan experencia con nan a yega hopi leu den bida a traves di deporte. Den un forma virtual a participa tambe nos atletanan Sarah Quita Offringa, Tarianna Doornkamp, Deaxo Croes y Chadwick Tromp. Por ultimo Minister Endy Croes ta gradici ATIA cu e iniciativa bunita y intersante aki dedica na nos atletanan.