Secretario General di MEP: Un Avestruz cu 2 cabes tanto Mike bou tera y Benny riba tera

Por tuma nota cu e caso Avestruz esta e caso di corupcion di mas grandi den historia di Aruba unda ex minister di AVP Benny Sevinger ta e sospechoso principal lo ta den corte e siman nos dilanti. Nos por a compronde cu ta trata di 22000 pagina di investigacion pues lo mira Ministerio Publico lastrando maleta(nan) di documento pa corte durante e siman aki. E caso aki lo dura alrededor di 4 luna esta ta cuminsa e siman di 5 di september y lo termina te december pa despues corte esta huesnan duna nan veredicto rond final di januari 2023.

AVP lo keda graba den historia pa KB y Corupcion:

AVP ta e partido cu lo keda graba den historia pa mal maneha e pais aki financieramente pero tambe e partido cu a probecha y “horta” patrimonio di pueblo pa haci negoshi cu esaki. Pa mal maneho financiero nos ta corda con e rapport Koerten (1994) con Henny Eman, cu su consehero e tempo aya Mike Eman a pidi un KB pa Watty Vos (def) y a haña esaki pa schaak maat Watty. Despues na 2014 Mike Eman mes a ricibi su KB y a keda yora bou palo dilanti cas di gobernador bebiendo ensure. Coincidencia? Paul Croes otro ex minister di AVP tambe tin (2) sentencia den corte di 4 aña di prison y 10 aña cu e no por traha den ningun funcion den aparato gubernamental y tampoco por ta riba un lista politico. Paul a wordo comproba den corte di a malusa su poder pa enrikece su mes a cambio di cobra pa permiso y shop serca supermercadonan Chines sin paga a cambio di fabor. Pues esaki ta tipifica AVP. Tico Croes otro ex Lider di AVP a wordo condena den corte pa corupcion esaki tabata den caso di Fondo di Desaroyo. Awor ta Benny Sevinger ta na turno cual sigur no lo scapa y e embergadura di e caso ta uno demaciado grandi y mahos.

Avestruz tin 2 cabes Mike Eman y Benny Sevinger:

Con un lider y ex Promer Minister di un pais por a laga su gobernacion y ministernan e tempo ey corumpi placa di pueblo na e manera aki?  Paul Croes ora el a bay sera pa 90 dia a lage sigui cobra salaris di Minister ciendo sera den KIA. Ki voorbeeld esaki ta? A aplaudie y hasta den Parlamento AVP a vota “voor” pa Paul por a keda cobra. Benny Sevinger siendo den KIA a apoye pa e keda riba lista y pa e keda den Parlamento. Ki ehempel Mike Eman y AVP kier manda pa pueblo? Cu locual ambos a haci ta normal? Ta “gangster” nos mester pa goberna e pais aki? Esaki Gerlien Croes ta defende? A la gangster? Kisas pa Gerlien esaki ta normal?  Avestruz aki ta un Avestruz di 2 cabes. Otro nos no por conclui. Mike Eman ta e Avestruz cu cabes bou tera “mi no ta mira y mi no ta tende nada”, mientras Benny Sevinger ta e Avestruz cu su cabes ariba tera tabata harasa y corumpi y causa e desaster cu el a haci. E siman aki e bala ta cuminsa lora y pueblo lo cuminsa tende di tur e fechorianan cu Benny y AVP a hasi. Alabes pueblo lo cuminsa haya sa di tur e nombernan di esnan cu a participa den e tereno gate aki. Tristo si cu hendenan asina ainda ta den politica. Aruba merece miho!