Parlamentario Marco Berlis (MEP): Caso di Benny Sevinger a cuminsa. Parlamentario di AVP hopi keto den reunion publico pa via di e caso Avestruz!

Dialuna mainta Parlamento a habri cu un reunion publico pa trata informacion di e Najaarsnota. E reunion cu a cuminsa un poco despues di 9or di mainta a cay riba e mesun fecha y momento cu a cuminsa trata oficialmente e caso di Avestruz den corte. E sospechoso principal di e caso Avestruz ta e politico di AVP Benny Sevinger, cu tin 5 acusacion serio contra di dje. Probablemente e tabata e motibo pakico Benny no tabata tey y niun di parlamentarionan di AVP kier a sali papia pa nada di mundo. Solamente Ryçond dos Nascimento a sali papia. Parce cu e lenganan berde di AVP a perde habla y a coy calamber, algo cu masha poco sa pasa. Tabata evidente pakico nan a abstene di haci esaki. Caso Avestruz ta e tercer (3) caso oficial di un politico riba e lista di e partido berde cu ta wordo acusa di corupcion y mester duna cuenta dilanti di mesa berde tambe. Ta parce cu AVP tin un atraccion special cu e mesa berde di Huez.

 

Tin un total mas di 22.000 pagina yena cu prueba y acusacion contra di Benny Zievinger. Caso Avestruz ta sumamente interesante y importante pa AVP, pasobra si Benny ta wordo condena e ta significa fin di e carera politico di Benny pero tambe un otro sla pa AVP. Probablemente esaki lo traduci den mas perdida di asiento di e partido di mas corupto den historia di Aruba. No mester lubida cu e 5 acusacionan ta: 1) Falsificacion, 2) Estafa, 3) Labamento di Placa, 4) Abuso di funcion, y 5)Soborno. Acusacionan serio cu ta wordo e siman aki den e caso y cual lo dura 4 luna. Ta premira cu un sentencia lo cay pa e luna di februari 2023.

 

E pregunta clave ta keda kico e parlamentarionan hoben lo haci si Benny mester keda condena? Kico extensionnan di AVP, partidonan di MAS y Accion 21 lo haci si Benny keda condena? Pasobra nan a kere cu nan aliado AVP lo bira nan pasashi pa drenta gobierno. Partido AVP cu a bolbe produci otro escandalo di corupcion pa berguensa di nos pais. E mesun partidonan “nobo” cu politica “nobo” cu ta grita y exigi integridad y transparencia di gobierno, ta den aliansa cu e partido cu e historia mas notorio di casonan di corupcion den historia di Aruba! Ki dia MAS y Accion 21 a cuestiona AVP riba tur e evidencianan di corupcion? Alcontrario e dos partidonan aki a brasa y acepta di ta un extension di AVP y a sali protege AVP ki ora cu nan por.

 

Naturalmente e pregunta tambe ta, ki excusa lo wordo uza pa hustifica pa keda den un partido, unda un lider cu a rally tur hende pa vota pa un politico cu a resulta despues di ta un politico corupto? Lo parlamentarionan di AVP keda sostene, ta fiel y apoya un lider cu ta promove y apoya corupcion, soborno, falsificacion, estafa, labamento di placa y abuso di funcion? Votadornan lo sigui apoya un partido berde pa tradicion of nan lo opta pa un otro partido cu ta lucha pa e bienestar di Aruba?

 

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!