MINISTER ENDY CROES TA FELICITA FUNDACION CHICO HARMS Y FUNDACION PRO – CULTURA CU UN TREMENDO PARADA CULTURAL.

ORANJESTAD: Diadomingo ultimo den bario di Brazil a tuma luga e Parada Cultural en conexion cu e celebracion di dia di Brazil. E aña aki ta di 10 aña cu Fundacion Chico Harms ta organisa e Parada Cultural. Na aña 2020 door di e pandemia no tabatin parada, pero e aña aki, Fundacion Chico Harms y Fundacion Pro-Cultura a sa di trece un parada yena di ambiente y musica. E parada a sali 3’or di atardi for di Centro di Bario Bazil a pasa den e cayanan di Brazil y bisindario y termina na Centro di Bario Brazil. Un total di 8 grupo, riba mil hende a participa. Minister Endy Croes, colega Minister Xiomara Maduro y Parlamentario Alvin Molina tambe a disfruta di e bunita parada celebrando cultura di Aruba. Minister Endy Croes a expresa cu tabata reina un tremendo ambiente, e bandanan musical a deleita tur esnan cu a forma parti di e parada como tambe e publico grandi na banda. Grandi y chikito a gosa di nos e celebracion cultural. E mandatario a enfatisa cu loke a resalta den e parada ta e creatividad, color y sin duda e ambiente.
Minister Endy Croes ta felicita sr. Chico Harms di Fundacion Chico Harms, Fundacion Pro – Cultura, boluntarionan y tur hende cu di un of otro forma a contribui pa haci e Parada Cultural uno asina bunita y exitoso.