Prome Minister Evelyn Wever – Croes: ANUNCIO DI INICIO DI PROYECTO PORT CITY TA RESULTADO DI PERSEVERANCIA Y DETERMINACION DI MINISTER DANGUI ODUBER
ORANJESTAD – Gobierno di Aruba ta anuncia un otro bunita proyecto cu lo percura pa desaroyo economico. E siman aki Prome Minister Evelyn Wever – Croes ta felicita Minister di Turismo Dangui Oduber cu a anuncia pasonan importante tumando luga pa duna inicio na proyecto Port City, un proyecto cu a cuminsa traha riba dje desde 2017.
Ora cu Covid a bati na nos porta, hopi a pensa cu Aruba no ta bay recupera, sinembargo Aruba ta den recuperacion. Desde inicio a bisa cu no kier solamente recupera y bay bek na e nivelnan cu tabatin prome cu pandemia, a bisa cu kier pa Aruba surpasa e nivelnan conoci anteriormente. Prome Minister a splica cu por a por haci esaki posibel diversificacion di economia ta cardinal.
‘Siman pasa Minister Glenbert Croes a anuncia cu ta bay construi Parke di Molina nobo esey lo bay trece diversificacion y desaroyo. Awe colega Minister Dangui Oduber ta anuncia Port City cu ta trece un otro aspecto di diversificacion. Asina ta bay sigui anuncia proyecto tras di proyecto, cu ta bay desaroya nos economia, crea cupo di empleo y trece progreso y bienestar pa henter Aruba,’ Premier Wever – Croes a expresa.
Prome Minister ta gradici tur esnan cu a haci esaki posibel y alabes desea hopi curashi den realicion di e proyecto. Minister Dangui Oduber cu a kere den e proyecto aki y a persevera, tabatin hopi curashi y determinacion pa a yega asina leu. Den e proceso e ta wordo asisti pa APA, Ports of Amsterdam y Departamentonan di Ministerio di Infrastructura, DOW, DIP y Kadaster.
