Minister Dangui Oduber MINISTER ODUBER LO COMPAÑA REINA MAXIMA DEN SU VIAHE DI TRABOU NA AUSTIN Y HOUSTON

ORANJESTAD – Diaranson atardi Minister di Turismo y Salud Publico sr. Dangui Oduber a sali rumbo pa Estados Unidos pa asina por compaña reina Maxima den su biahe di trabou.

Austin

Diahuebs Minister Oduber lo ta na e estado di Austin na unda e lo participa na un conferencia di salud conhuntamente cu minister Ernst Johan Kuipers cu ta e minister di Volksgezondheid, Welzijn en Sport (VWS) di Hulanda. E conferencia di salud ta organisa enconhunto cu Austin Healthcare Council, cu ta un organisacion non-profit cu a wordo funda door di e lidernan di e industria di salud cu ta traha hunto cu un solo meta, pa establece Austin su posicion global como e centro di innovacion pa salud. Akinan lo brinda e oportunidad pa asina fortalece cooperacion despues di e ultimo bishita na aña 2019 cu a tuma luga na Texas, pero tambe cu miras pa futuro y pa oportunidadnan di traha den colaboracion.

Minister Oduber tin e oportunidad di hiba palabra y lo comparti e experiencia di con innovacion y tecnologia a yuda Aruba maneha e pandemia di COVID19. Lo elabora sigur ariba Aruba Health App cu a wordo crea durante e pandemia pa facilita e proceso di test y tambe pa centralisa informacion di cada pashent di un manera optimal, digital y accessibel pa tur hende den comunidad di Aruba. Lo elabora adicional con despues a incorpora e uzo di e sistema pa ta un solucion caminda cu pasaheronan por presenta nan datonan personal di salud na aerolinea, hotel y tur e partner nan den e industria di hospitalidad den un forma priva y sigur. Lo pone enfasis riba e hecho cu Aruba, un pais asina chikito, ta un ehempel pa diferente paisnan mas grandi. Lo papia over con otro paisnan grandi tambe a opta pa implementa e sistema aki despues cu nan a wak con eficiente e aplicacion aki ta.

Despues lo compaña reina maxima y minister Kuipers di salud pa bishita Hogg Foundation di salud mental. Kinan lo trata varios tema di interes comun con paisnan ta atende cu tur retonan den salud mental y comparti diferente datos pa elabora riba con paisnan por yuda sostene y coopera cu otro den esaki. Na Hogg Foundation e meta principal ta con pa incorpora innovacion pero tambe siña traha na un manera mas preventivo riba e tereno di salud mental, especialmente pa nos hobennan.

Houston

Diabierna minister Oduber lo ta na Houston, caminda e lo haña un recorido di e Texas Medical Center (TMC) Innovation y alavez e lo bishita MD Anderson Cancer Center cu reina Maxima y tambe minister Kuipers. E dos centro medico nan aki ta renombra como un di e mihonan rond di e pais. Durante e bishita aki nan lo haña diferente presentacion di expertonan den e ramo di salud y tambe lo tin oportunidad pa haci pregunta.

Minister Oduber ta haña e oportunidad aki importante pa por crea cooperacion internacional nobo y fortifica esunan existente. Tambe e ta sumamente orguyoso di tin e oportunidad pa por hiba palabra den nomber di Aruba pa focus riba e importancia di innovacion den cuido y con tecnologianan avansa por yuda mehora calidad di cuido.

E biahe aki su enfoce principal ta innovacion riba tereno di salud.