Laboratorio di Aruba y Corsou dispuesto pa uni forsa pa progresa.

E dos ekiponan a mira varios oportunidad caba cu por siña di otro

 

Durante luna di mei LABHOH a bishita Corsou pa topa cu coleganan di ADC (Analytisch Diagnostisch Centrum) y conoce di cerca e laboratorio di mas grandi di Corsou. Na juli e directiva di ambos laboratorio a firma un declaracion di intencion pa cooperacion. Ta trata di un trayecto cu ta canando actualmente pa asina formalisa pronto den un acuerdo concreto unda e laboratorionan di mas grandi riba ambos isla lo traha hunto riba diferente tereno. Debi na nos tamaño como isla nan, ta premira un lista di beneficio pa Aruba y Corsou, ora cu cumpra hunto, sigui estudionan specialisa hunto y traha hunto. Ambos organisacion ta dispuesto pa yega na un acuerdo formal, claro semper garantisando independencia di cada uno.

 

LABHOH TA CONTA DI E BENEFECIONAN

Segun clustermanager na LABHOH, Junaica Donata, na luna di Augustus nos a yama laboratorio ADC bon bini na Aruba unda sesionnan a sigui pa asina yega na palabracion mas estrecho p’e intencion di declaracion. E acuerdo aki lo contribui na un eficiencia den costo, cuido mas controla, y un servicio di calidad halto pa cliente/pashent. Tambe importante ta pa comparti conocemento, procesonan y mucho mas cu alfinal lo benefecia tur cu ta haci uzo di servicio di LABHOH y ADC na Aruba y Corsou.

 

CORSOU A BIN CONOCE ARUBA

Lisette Provacia, Hoofd Moleculair Diagnostiek, a comenta cu e bishita aki a bin despues cu un grupo di profesional di LABHOH a bishita coleganan di Corsou y a culmina den e firmamento di declaracion di intencion. Awo a toca turno na nan pa bin haci un bishita na Aruba. Tabata dos dia extenso di un programa yena di reunion nan den cual a intercambia idea riba tur tereno.

 

E delegacion di Corsou tabata consisti di cuater colega di e departamento di Recurso Humano, Hoofd Moleculair Diagnostiek, e manager di calidad y un klinisch chemicus. Den e prome salida aki caba e ekipo di Aruba y Corsou a nota varios oportunidad cu por siña y yuda otro. Pa awo, e delegacionnan a acorda cu lo sigui e trayecto via mail y percura pa e acuerdo sigui desaroya y pa fin di aña por bisa cu lo logra termina cu henter e lista di accion cu a traha hunto na luna di mei. Despues di esaki lo haci un evaluacion pa asina yega na un acuerdo formal entre e dos laboratorionan.

 

DECLARACION DI INTENCION

LABHOH hunto cu ADC NV ta ofrece diagnostico di laboratorio pa ‘eerste en tweede lijn’ den e ambito di klinische chemie, hematologia, patologia, microbiologia medico y bacteriologia di forma amplio na Aruba y Corsou. Ambos ta proporciona diagnostico 24 ora pa dia, 7 dia pa siman, n’e hospital di Aruba y tambe Hospital di Corsou y ta colabora estrechamente cu un centro specialisa na Hulanda. E servicio ta esencial p’e sector di salud publico y por lo tanto ta desempeña un papel importante p’e comunidadnan y pa turismo di e islanan.