NA AUGUSTUS 2022, ARUBA A RICIBI 100,770 BISHITANTE “STAYOVER”.

AUGUSTUS 2022 A SURPASA E CIFRANAN DI AUGUSTUS 2019.

2022 DEN COMPARACION CU 2019

Oficina di Turismo, A.T.A., ta informa cu pa luna di augustus nos destinacion a ricibi un total di 100,770 bishitante “stay-over”. Si compara luna di augustus 2022 cu augustus 2019 – cu tabata e ultimo aña normal di turismo, por mira cu Aruba a recupera 105% di locual a wordo ricibi na augustus 2019. 

E tres mercadonan cu mas a destaca den e cantidad di turista cu a bishita na augustus 2022 como tambe den grado di recuperacion den e diferente regionnan ta; Estados Unidos cu 78,307 bishitante cu ta representa un grado di recuperacion di 110% den comparacion cu augustus 2019, Hulanda cu 3,236 bishitante cu ta representa un grado di recuperacion di 98% den comparacion cu augustus 2019 y Colombia cu 2,384 bishitante cu ta representa un grado di recuperacion di 87% den comparacion cu augustus 2019.

2022 DEN COMPARACION CU 2021

2022 ta mustra un crecemento mas fuerte y stabil cu 2021.Si compara augustus 2022 cu augustus 2021 por wak cu crecemento di 26% den cantidad di bishitantenan “stayover”, for di 80,230 bishitante pa 100,770 bishitante.

MERCADONAN

Norte America ta keda e mercado mas fuerte pa Aruba y na augustus 2022 un total di 80,862 bishitante Norte Americano a bishita Aruba. Esaki ta 80.2% di e total di e bishitantenan “stayover”. Na augustus 2022, Europa a trece 9,701 bishitante pa Aruba, cu ta 9.6% di e total di bishitantenan “stayover”. Un total di 7,641 bishitante cu ta representa 7.6% di e bishitantenan “stayover” tabata procedente di Latino America; y 2.5% di e total di bishitantenan stayover pa augustus 2022- cu ta 2,566 bishitante, a bishita nos isla for di otro partinan di mundo. 

2022

E prome 8 lunanan di 2022 Aruba a ricibi un total di 738,101 bishitante “stayover”, cu ta representa un grado di recuperacion di 95% compara cu e mesun lunanan di 2019. Mester agrega cu den e prome 8 lunanan di 2022 e mercado di Estados Unidos a surpasa e cantidad di bishitante den e mesun periodo di 2019 cu 2,874 bishitante.

TOURISM CREDITS / CENTRAL BANK OF ARUBA  

Di acuerdo cu Banco Central e asina yama ‘Tourism Credits’ (anteriormente yama “Tourism Receipts”) pa aña 2021 a contribui cu AWG 3,169.9 miyon den nos economia, cu ta 65.5% mas compara cu e mesun temporada na 2020. Esaki naturalmente ta debi na e pandemia global di Covid-19 durante cual Aruba tambe a cera su fronteranan temporalmente entre mita di augustus 2020 te cu augustus 2020. Tourism Credits a recupera cu 85% si compara 2021 cu 2019.