Tienda di Ley
ORANJESTAD – Riba 24 september 2022 e Facultad di Ley di Universidad di Aruba lo habri su portanan di e Tienda di Ley. E prome citanan lo bay tuma lugar e mesun dia aki di 9 am pa 11am.
Kico e Tienda di Ley ta haci ?
E Tienda di Ley lo yuda personanan cu tin problema legal y cu no tin e placa of suficiente placa pa paga un experto legal. Esaki ta sosode door di traha un advies (conseho) tocante e problemanan aki. E Tienda di Ley por duna conseho tocante preguntanan legal di labor, huur, daño, contractnan, areglonan di pago, divorcio, inmigracion y cu yenamento di formulario legal. Si tin un problema legal cu e Tienda di Ley no por handel, e persona lo haya un carta pa bay na un otro instancia concerni. E Tienda di Ley ta duna conseho solamente y no ta defende personanan den procedura legal.
Con e Tienda di Ley ta funciona ?
Studiantenan di e Facultad di Ley lo yuda personanan den e Tienda di Ley. Durante e cita, dos studiante lo bay yuda bo persona cu e problema legal y bo persona lo mester splica e studiantenan tocante e problema aki. Despues e studiantenan y nan guia lo planea con nan ta bay handel e caso aki pa bo persona. E studiantenan lo haci un onderzoek pa soluciona e problema legal y pa contesta e preguntanan haci door di bo persona. Despues bo persona lo haya un conseho legal di e studiantenan.
Con mi por inscribi mi caso na e Tienda di Ley?
Universidad di Aruba ta organisa e Tienda di Ley. E Tienda di Ley ta habri riba e siguiente dianan:
| Fecha | Orario |
| 24 september | 09.00 – 11.00 |
| 8 october | 09.00 – 11.00 |
| 29 october | 09.00 – 11.00 |
| 12 november | 09.00 – 11.00 |
| 26 november | 09.00 – 11.00 |
| 3 december | 09.00 – 11.00 |
| 14 januari | 09.00 – 11.00 |
| 28 januari | 09.00 – 11.00 |
Pa por yuda bo persona cu e caso, bo persona lo mester di un cita. Pa por haci un cita por bay riba e Facebook-pagina Tienda di Ley of por haci esaki via e e-mail: tiendadiley@ua.aw. Riba e pagina di Facebook lo por haya un formulario pa inscribi e caso of por manda e formulario pa inscribi e caso tambe via e-mail. Tambe bo persona tin e opcion pa pasa na e Universidad di Aruba durante e dia y ora cu e Tienda di Ley ta habri pa busca un formulario pa inscribi e caso. E Tienda di Ley no tin un number di telefon.