Parlamentario Ricky Hoek (MEP):
Ta haci peticion na Minister di Husticia y Asunto Social pa sondea posibilidad pa sostene Bureau Slachtofferhulp Aruba

Den e area di trabou social tin diferente departamento, instancia, fundacion y asociacion cu ta duna servicio na un of otro grupo den comunidad a base di nan situacion y necesidad. Tur instancia riba nan mes sigur ta importante y necesario tanto pa e area social como nos comunidad cu ta depende riba e ayudo profesional y valioso cu ta ser brinda na esnan den un situacion poco faborabel.
Sinembargo, no ta tur departamento of instancia ta funciona na e mesun manera. Esaki debi na e infrastructura y/of cierto factornan cu ta minimalisa e eficiencia, servicio y calidad di e instancia.

Un di e instancianan cu lo mi bay enfoca riba dje ta Bureau Slachtofferhulp Aruba (BSoHA). BSoHA a bira operacional riba 15 di november 2006 y actualmente e ta resorta bou di Cuerpo Policial Aruba (CPA). Dicho instancia tin como meta pa yuda victimanan (incluyendo familiarnan (cu ta keda atras) y testigonan) den caso di delito, accidente (di trafico) cu consecuencia mortal y/of lesionnan grave y calamidad. Sinembargo, den un observacion (personal) haci riba e instancia aki, mi a tuma nota cu tin varios factor cu ta influencia e servicio y calidad di trabou di e instancia.

Un di e observacionnan primordial ta cu mester reconoce cu nos populacion actual ta conta cu alrededor di 110 mil habitante. Esaki ta pone un presion hopi grandi riba e instancia pa por cumpli cu su meta y servicio na e manera debido, teniendo na cuenta e personal di e instancia. Un otro observacion ta cu si Bureau Slachtofferhulp Aruba mester keda bou di Cuerpo Policial Aruba of mester bay resorta bou di Departamento di Asunto Social of lo mester keda independisa.

Den mi calidad como miembro di Parlamento pa fraccion di MEP, lo mi entrega algun pregunta na e Minister di Husticia y Asunto Social. Esaki como meta pa sondea posibilidadnan den ki forma lo por sostene Bureau Slachtofferhulp Aruba. Tanto pa sostene BSoHA su personal, clientenan, partnernan di trabou y mantene e calidad di servicio cu ta ser brinda.