Minister di Cultura Xiomara Maduro: Gobierno di Aruba a reconoce Massive Brassband International
Pa promove nos musica di asambeho den e parke di diversion mas bishita na mundo y representa nos Pais Aruba dignamente den exterior
Diabierna ultimo Gobierno di Aruba pa medio di Ministerio di Cultura a organisa un bunita anochi dedica na Massive Brassband Internacional. Manera ta conoci recientemente Massive Brassband International a duna un magnifico presentacion den e parke di diversion mas grandi na mundo Disney Magic Kingdom kende ta celebrando 50 aña di existencia.
E anochi a conta cu discurso di Minister di Finansa y Cultura Xiomara Maduro cu a gradici tur e integrantenan di Massive Brassband pa nan presentacion den Magic Kingdom dia 5 di augustus ultimo. E mandatario a trece dilanti cu tabata un soño cu e director musical di Massive Brassband International, Roderich Lopez tabatin desde tempo cu e tabata mucha. Un soño cu el a haci un proyecto y a traha duro cu hopi pasion riba esaki, pa e por a bira realidad. Esaki ta otro prueba cu ora bo ta traha duro, cu perseverancia y cu hopi fe bo ta logra. Despues di varios intento cu Disney, e momento a yega e aña aki presenta den e parada di celebracion di 50 aña di Magic Kingdom. Bunita ta cu algun musico di un otro grupo di brassband, TBS Aruba a join y hunto cu bailarinanan y famia a biaha yen di animo pa bay laga Aruba su musica di asambeho zona den e cayanan di Walt Disney World.
Arubianonan residencia na Merca y tambe esnan cu a bay cu vakantie pa disfruta, a demostra e gran amor cu nos tin pa nos Pais y pa nos hendenan cu bandera di nos dushi Pais a bay pa apoya y presencia e acto historico aki. Minister Maduro a trece dilanti cu e atardi ey, Aruba tabata claba riba facebook en espera di e gran presentacion y tabata un emocion grandi y orguyo di mira e bandera di Aruba ta habri e parada. E momento ey Aruba a uni den un alegria inmenso cu un sentimento di orguyo, admirando nos yiunan di tera presentado den e parke di diversion mas famoso di mundo.
Den nomber di Gobierno di Aruba, Minister di Cultura a gradici cada uno cu di un of otro manera a aporta pa e acto historico por a tuma luga. Un danki di curason na cada uno pa tur e esfuersonan haci, trainingnan, sacrificio pa e presentacion aki por a tuma luga. Nos Pais ta chikito pero grandi na talento artistico, creativo y cu curashi. Aruba a bolbe demostra cu e tin hopi potencial y a briya un bez mas riba tarima internacional. Tabata un promocion impagabel cu a duna Pais Aruba.
Un pabien grandi na cada un pa e bunita trabou y e logro historico aki, Gobierno y pueblo di Aruba ta hopi orguyoso di boso asina minister Maduro a expresa.
Durante e anochi tabata tin presentacion di John Francis Jacobs cu a pone ambiente cu su steelpan y excelente presentacion di baile di Aruba Carnival Experience. Minister di Cultura Xiomara Maduro hunto cu Parlamentarionan Darlaine Guedez-Erasmus, Alvin Molina, Shaylini Tromp-Lee y Ricky Hoek a entrega Medaya di Aprecio na cada uno di e delegacion di Massive Brassband cu a presenta na Magic Kingdom. Despues a sigui cu entrega di un plakaat di parti Minister di Cultura Xiomara Maduro den presencia di Minister President Evelyn Wever-Croes na Massive Brassband International cual a wordo ricibi pa Roderich Lopez, director general di Massive Brassband International. Un bunita anochi di reconocimento di Massive Brassband.
