Parlamentario Alvin Molina (MEP): Siguridad den trafico San Nicolas

E crusada banda di Carnival Village na San Nicolas, Lagoweg – Bernhardstraat, ta un crusada sumamente peligroso. Automobilistanan cu ta subi e crusada biniendo di Zuid Lagoweg, simplemente ta ‘gamble’, riscando nan bida y di otro. Door cu nan no tin bista ‘whatsoever’ ki trafico ta bin di pabou! Antes tabata tin un spiel riba e edificio na skina cu ta yudabo pa por mira trafico cu ta biniendo di abou, e spiel no tey mas, sumamente peligroso.

Pa e motibo aki mi a entrega un mocion october aña pasa, cu a ricibi apoyo unanimamente di Parlamento, pa construi un rotonde na e crusada aki.  Mi a ricibi contesta di DOW cu e caminda aki ta parti di Green Corridor cu ta cay bou di maneho di Caribbean Infrastructure Company (CIC). Un rotonde riba e caminda aki lo mester di aprobacion di e compania na Colombia te hasta na Merca. Riba mi pregunta con por logra esaki of si kisas tin otro manera pa por haci e crusada mas safe, mi a ricibi e contesta cu un ‘sleeping police’/drempel riba Bernhardstraat na altura di Green Hill supermarket bin ariba, lo slow down trafico cu ta bin di abou dje forma cu trafico cu ta bin di Lagoweg por subi e crusada na un manera sigur. E proceso pa un ‘sleeping police’ lo ta mas facil/lihe cu pa rotonde. Mi ta bay keda den contacto cu DOW y bureau di Minister pa ‘follow up’ riba esaki.

Combersando cu habitantenan di San Nicolas, a bin na cla cu tin varios caminda cu trafico ta forma un peliger pe habitantenan y specialmente pe muchanan. Como tambe e ta forma peliger pa e cas, cura y autonan staciona den bisindario. Pa cu e camindanan aki tambe mi a entrega un peticion pa evalua si ‘sleeping police’ ta un bon manera pa haci trafico mas sigur y con por logra pa nan wordo instala.

Den un combersacion cu director di DOW, sr. Marlon Croes, el a splicami un punto hopi importante. Cu no ta solamente responsabilidad di DOW pa tene trafico na Aruba sigur. No ta posibel pa yena tur caretera na Aruba cu ‘sleeping police’. E ta un tarea tambe di Cuerpo Policial pa haci control, pero vooral tambe importante cu pueblo wordo educa con pa haci uzo di nos careteranan na un manera responsabel y sigur.