Minister Geoffrey Wever: Inicio di Aruba Fair Trade Authority: un cambio structural pa nos economia

Den un conferencia di prensa diahuebs mainta, Minister di Asuntonan Economico, mr. Geoffrey Wever, a anuncia e inicio di e trayectorio di implementacion di e autoridad di competencia, Aruba Fair Trade Authority (AFTA).

Aruba Fair Trade Authority ta un entidad huridico cu su tarea principal pa crea un nivel di competencia husto, encarga cu implementacion y supervision di e ley di competencia. Competencia liber y sin limitacion pa tur compania na un pais ta stimula inversion y desaroyo di comercio.

Mayoria di pais desaroya rond di mundo ya tin un organo manera AFTA pa evita cu tin abuso contra e consumidor. Pa varios aña profesionalnan a conduci investigacion y a introduci un ley riba competencia cual a wordo aproba den Parlamento di Aruba na 2020. Den cuadro di e reformanan economico, implementacion di AFTA a wordo poni como prioridad.

 Según e mandatario, “AFTA lo contribui na prijsnan mas barata di producto y servicio pa nos consumidornan, mas escohencia di producto y servicio, mihor servicio y producto y servicionan innovativo”.

Minister Wever a gradici directora di Departamento di Asuntonan Economico, Industria y Comercio, sra. Maria Dijkhoff-Pita, pa su dedicacion den e proyecto aki. Tambe a introduci e team di experto cu lo traha na implementacion di AFTA:

Sr. Albert Scholten, Sra. Amanda Maduro y Sra, Carondina Leijdekkers.

Minister Wever ta agredeci tambe su colega ministers cu a duna apoyo na e proyecto aki asina alocando fondonan adicional pa por implementa e Aruba Fair Trade Authority, mirando e importancia di esaki pa nos economia. Tambe ta reconoce tambe e rol importante cu Hulanda a fungi dunando Aruba un sosten financiero di 620.000 florin pa implementacion di e AFTA.

Albert Scholten ta un experto internacional riba e area di competencia y a presenta kico AFTA lo nifica pa Aruba. Señor Scholte ta subraya cu AFTA tin gran beneficio pa e consumidor, negoshinan y economia, y cu economianan chikito y habri ta beneficia di un organo manera AFTA. Señor Scholte ta splica cu mas di 125 pais tin un autoridad di competencia y e efectonan ta positivo pa e economia di e pais.

“Esaki ta un momento historico y sumamente importante pa economia di Aruba y mi ta convenci, mescos cu e expertonan cu a yuda nos, cu e Aruba Fair Trade Authority lo trece cambionan structural importante pa nos economia y pa tur ciudadano, den nan rol como consumidor. Awe e ciudadano di Pais Aruba por ta orguyoso cu Aruba ta un pais cu tambe tin un autoridad di competencia husto cu tin e consumidor na pecho”.