Minister Dangui Oduber: SECTOR DI HORECA A HAYA UN PRESENTACION DI E SISTEMA NOBO DI DIGITALISACION DI PERMISO

ORANJESTAD – Dialuna mainta Sr. Oduber, minister di Turismo y Salud Publico, a tene un reunion informativo cu diferente stakeholders’ den cuadro di digitalisacion di permiso. Pa minister Oduber ta importante pa elimina e “red tapes” cu tini. E reunion tabata uno sumamente informativo y fructifero caminda cu tur stakeholder a haña un presentacion di con e sistema aki lo ta traha una bes cu e proyecto wordo finalisa.

E sistema aki ta conoci como DECOS na Hulanda y e ta un sistema cu gobierno di Aruba conoce pa 20 aña caba. DECOS ta un ‘document management system’ caminda cu tur documento ta wordo agrega ariba un dossier electronico. E stap aki ta uno necesario pa incorpora sostenibilidad den nos maneho y tambe seguridad di informacion.

E bentaha di e sistema aki ta e oportunidad pa colabora y traha hunto. Por medio di e sistema aki diferente stakeholders por traha hunto riba e mesun documento cual tambe lo inclui tools pa contesta pregunta den un tempo mas cortico, y tambe pa ta mas eficiente. E ta importante pa nota cu e sistema aki ta traha via conexion di internet. Un otro bentaha di e sistema aki ta cu e trahado di e dienst y tambe e persona/compania cu ta hasi e peticion tin un bista di ful e proceso y por monitor con leu su peticion ta.

Desde comienso di e proceso di e peticion e persona/compania por subi riba e sistema aki y haya un splicacion di ful e proceso prome cu e yena su peticion. Esaki ta zorg pa eficiencia pasobra tur documento y rekisito lo mester wordo yena prome cu esaki wordo procesa. E sistema aki tambe lo traha cu un timeline, haciendo e proceso uno mas cortico y dunando es cu ta solicita como tambe e dienst concerni un mihor bista di e peticion y e tempo necesario pa finalisa esaki.

Minister di Turismo y Salud Publico kier gradici KPA, Brandweer, DVG y ITP Caribbean pa e colaboracion den e proyecto aki. Esaki sigur ta un stap importante pa traha mas eficiente y sostenibel, incorporando innovacion y asina mehorando e calidad di servicio cu nos ta brinda nos ciudadanonan.