Politica

Aruba ta saliendo for di e crisis y ta na caminda pa un recuperacion total

Partido MEP a tuma nota di e ultimo Reaccion di Comision di Supervision CAFT pa loke ta e reportahe di ehecucion (uitvoeringsrapportage) di e di dos kwartaal di 2022. Locual a resalta den e reaccion aki ta varios punto positivo y alentador relaciona cu e desaroyo financiero economico di pais Aruba.

Hecho ta cu nos opositornan politico, gremio comercial y sindical – consciente di tur loke nos pais a pasa aden durante e ultimo 2 añanan debi na Covid y e pandemia mundial – constantemente tabata cuestiona e maneho cu Gabinete Wever Croes a hiba den su lucha contra e efectonan negativo di e pandemia y semper nan tabata referi na e publicacionnan di CAFT cu tambe tabata hopi critico den relacion cu gobierno.

Advertisements

Sinembargo awe CAFT mes den su ultimo reaccion di e dos kwartaal di 2022 ta trece padilanti varios resultado positivo pa loke ta e maneho hiba pa Gabinete Wever Croes. Naturalmente tin varios reto ainda cu mester haya un solucion, pero generalmente nos pais ta riba bon caminda pa loke ta henter e desaroyo financiero economico.

Resultadonan positivo

CAFT ta constata den su ultimo reaccion di e di dos kwartaal 2022 lo siguiente:

  1. Den e prome mita di 2022 e surplus financiero di e sector colectivo ta 21 miyon florin, cual ta 0.4% di nos GDP.
  2. E entradanan di belasting directo te cu e di dos kwartaal di 2022 ta mas halto cu den e mesun periodo di 2021.
  3. E entradanan di primanan di seguronan social desde e prome kwartaal di 2022 ta bek na e nivel di 2019.
  4. E recuperacion di e entradanan indirecto ta continua y ta spera un entrada inespera (meevaller) debi na e recuperacion economico. E belasting adicional pa e proyectonan PPP, esta e BAVP a yega caba na e nivel di 2019. E nivel di realisacion di e demas belastingnan indirecto ta den direccion positivo. Di acuerdo cu e Nieuwjaarsnota 2022 e belastingnan indirecto ta aumenta cu 30 miyon florin.
  5. Den e presupuesto 2022 tin un suma di 433 miyon florin na gastonan di personal. Den e Nieuwjaarsnota e suma aki a wordo adapta na 426 miyon florin y segun CAFT esaki lo cumpli cu e norma di gastonan di personal.
  6. Te cu e di dos kwartaal di 2022 Aruba a realisa 86 miyon florin na gastonan di producto y servicio cu ta igual na 40% di e presupuesto.
  7. E realisacion di e impuesto di transferencia (overdrachtsbelasting) na fin di e di dos kwartaal ta mas o menos 50 % di e presupuesto. Debi na compra di viviendanan vacacional door di no residentenan den e prome mita aña e overdrachtsbelasting a yega caba na 100% di su realisacion.
  8. SVB ta spera di por recobra un suma di subsidio di salario (loonsubsidie) di 49 miyon florin den 2022. Di esaki SVB ya a logra ricibi un suma di 32 miyon florin.
  9. E gastonan total realisa te cu e di dos kwartaal 2022 a yega na 672 miyon florin. Esaki ta 192 miyon florin menos compara cu e di dos kwartaal di aña pasa.
  10. E kapitaal dienst ta mustra te cu e di dos kwartaal un resultado positivo di 9 miyon florin.

Por lo general, den e tabel adhunto por mira cu e entradanan total a aumenta for di 492 miyon florin te na 643 miyon florin y e gastonan total a baha for di 864 miyon florin te na 672 miyon florin den e di dos kwartaal di 2022 compara cu 2021. E deficit a baha di -363 miyon florin te na -19 miyon florin den e di dos kwartaal 2022!

Partido MEP kier a comparti tur e puntonan positivo aki  y ta convenci cu ora un pais tin un gobierno cu ta traha cu curashi, determinacion y un fe grandi e resultadonan positivo ta bira visibel pa un y tur den comunidad.  Aruba ta recuperando positivamente!