Minister di Cultura ta elabora riba trabaonan di e prome aña di gobernacion:
A dedica na e celebracionnan cultural importante di nos Pais, a reconoce nos baluartenan cultural y a traha pa conserva y expone nos herencia cultural
Cultura tin un papel clave den e desaroyo duradero di un Pais

Pa locual ta e prome aña di Gabinete Wever-Croes II, Minister Xiomara Maduro ta splica den lineanan grandi e trabaonan realiza bao di e maneho di ‘Cultura bo tin cu bib’e.’ Cultura tin un papel clave den e formacion di e hende, e desaroyo duradero di nos Pais y ta instrumental pa Aruba su economia, bida social, medio ambiente y bienestar general. Pa e diversificacion di Aruba su economia, cultura tin un rol escencial den e sector prometedor di e Industria Creativo. Den e prome aña di gobernacion, Gobierno a dedica na e celebracionnan cultural importante di nos pais, caminda a reconoce nos baluartenan cultural y a traha pa expone nos herencia cultural.

Conferencia 35 aña Status Aparte
Pa conmemora e 35 aniversario di Status Aparte di Aruba, Gobierno a organisa e Conferencia ’35 Aña Status Aparte, Aruba ta di nos tur.’ Un conferencia den cual por a aprecia e historia di e comienso, e lucha, e desaroyo y e miras pa futuro di Aruba como Pais autonomo den Reino Hulandes. E mensahe principal di e conferencia tabata, ‘Aruba ta di nos tur y Aruba mester di nos tur pa por surpasa e retonan nos dilanti.’

Programa Educativo “Kibra Coco”
Pa nos hobennan por siña y biba nos cultura, a introduci un programa educativo na television pa muchanan di scol preparatorio y basico yama Kibra Coco. Esaki ta un quiz cu ta pone atencion na nos dianan di celebracion nacional manera, Dia di Betico, Dia di Himno y Bandera y San Juan – Dera Gay. Hunto cu esaki a traha riba tres video informativo ‘Historia di Nos Gran Libertador Betico Croes’, ‘Conoce Nos Himno, Nos Bandera y Nos Escudo’ y ‘Dia di San Juan – Dera Gay | Nos Tradicion’.

Parada Nacional di Luz – Cend’e Mecha
Pa reactiva Aruba su nos economia y como parti di e ‘Exit Strategy Covid 19,’ Gobierno a organisa un Parada Nacional di Luz. Cu esaki a ‘Cend’e Mecha’ pa e preparacion oficial di locual ta trata e exposicion cultural di mas grandi di Pais Aruba cu ta Carnaval. E gozo, alegria, union y creatividad den e colornan di e Bandera di Pais Aruba a resalta den e Parada Nacional di Luz.

Reconocimento na nos Baluartenan Cultural
Gobierno a reconoce varios Baluarte Cultural, entre nan, sr. Janiro Eisden pa su 30 aña cu ela dedica na farandula di Aruba, sr. Etty Toppenberg den feliz memoria pa deleita y yuda nos tene nos herencia cultura bibo pa mas di 65 aña, Massive Brassband bou direccion di sr. Reinwald Roderich Lopez pa promove nos musica di Asambeho den e parke mas bishita na mundo Disney Magic Kingdom y sr. Jossy Brokke, e voz di oro, pa su 60 aña den farandula.

Promove arte bou di nos hobennan
Pa por fomenta arte bou di nos hobennan, a sigui cu competencia di Arte di Palabra, Poeta di Patria, Dream-Dare-Do, Gang di Arte y tambe gobierno a instala un comision pa presenta un plan pa educacion cultural na scol.

Campaña 3C – Colecta-Conoce-Conserva
Pa conserva y expone nos herencia cultural, Gobierno a organisa un campaña 3C-TRECE cu e meta pa Colecta-Conoce-Conserva documento, potret y informacion digital cu ta importante pa keda archiva y exponi na conocemento di nos comunidad. Di e manera aki ta conscientisa nos comunidad di e balor pa conserva material historico cu ta forma parti di e memoria colectivo di nos Pais.

Produccion di programanan educativo y informativo
Gobierno a produci tambe programanan educativo y informativo na television. Asina nos por a mira e programa ‘Cera Conoci cu RCC Aruba’, cu ta un grupo di acrobacia cu ta representa Aruba riba tarima internacional. Alabes a produci un programa tocante ‘Conscientisacion di e Dia di Dera Gay’ y tambe ‘Historia di Esclavitud na Aruba’ pa asina nos como comunidad por acepta nos pasado di sclavitud for di un perspectiva di libertad.

Minister Maduro ta finalisa recordando cu Cultura tin un papel clave den desaroyo duradero di un Pais. Cultura ta instrumental pa economia, bida social, bienestar general y medio ambiente di un Pais. Como mandatario lo sigui traha duro riba e industria creativo, cu lo bay keda desaroya durante e transcurso di proximo añanan.