Expertonan di WEB a revela desaroyonan hopi serio cu proyecto di LNG

Partidonan di oposicion ta exigiendo claridad

Expertonan di e compania estatal WEB Aruba NV, e siman aki den declaracion duna na prensa, a divulga desaroyonan cu a lanta ainda mas preocupacion cerca e tres fraccionnan den oposicion, esta esunnan di AVP, MAS y Accion21.

Actuando mesora diahuebs mainta e tres fraccionnan a manda dos carta caminda ta pidi un reunion publico, esta un “publieke bijeenkomst” caminda lo invita expertonan di tanto VWI como SIWA, pa duna informacion na Parlamento di desaroyonan hopi dudoso cu henter e proyecto di LNG. Den e otro carta a pidi tanto Prome Minister como Minister di  Energia  pa para e desaroyonan dudoso cu via di Utilities gabinete Wever Croes a bin ta imponiendo riba e planta di awa y electricidad.

“Cosnan cu expertonan a revela den e dianan aki, ta entre otro cu e caminda cu realmente mester a ubica  e planta di operacion di LNG cu tabata na Barcadera y no den e refineria y esaki pa dos motibo, entre otro e distancia e gastonan lo tabata menos y otro motibo sumamente impotante, ta pa e hecho cu e tuberianan e ora no mester a pasa den barionan densamente pobla mnanera dor di barionan di Zeewijk, na Savaneta, na Brazil, na Pos Chikito pa asina por yega te na WEB.

Un iresponsabilidad cu e expertonan di WEB aki  a mustra ta cu tubonan di gas di e forma aki, tin nan peliger cu nan y pasando nan den barionan pobla, mientras cu tabatin un alternativa pa Sali for di Barcadera  riba un tereno industrial y yega pa WEB, ta mustra cu decisionnan cu a cay rond di LNG ta decisionnan hopi dudoso economicamente, comercialmente pero tecnicamente  tambe ta decisionnan cu no tin pia ni cabes.

Tur e informe nan  aki cu a wordo treci dilanti pa  experto  y profesionalnan di WEB, ta landa e speculacion y inkietud den nos comunidad ainda mas, cu e direccion cu e gobierno aki ta bayendo, ta simplemente cometiendo atraco riba companianan estatal di pais Aruba, no na interes di comunidad, no na interes di miho prijs di awa y coriente  pero simplemente pa interesnan partidista, interesnan di amigo y sponsornan.

Nos di fraccion di AVP ta sumamente preocupa mescos cu e otro fraccionnan di MAS y Accion21 pa e desaroyonan aki y e preocupacion ta asina grandi cu nos ta urgi gobierno na e momentonan aki   pa para tur metemento cu ta tumando luga den WEB pa medio di Utilities ta na mes momento nos ta urgi pa mas pronto posibel Parlamento yama un reunion pa scucha expertonan di WEB caminda nan por papia libremente pa vocifera nan preocupacion grandi pa e desaroyonan di ultimo tempo pa medio di Utilities NV,” Parlamentario Mike Eman a declara.