Como ganador di AAA su Wings of Hope Energy Champion Competition:
Colegio Cristo Rey ta ricibi oficialmente nan solar panels

ORANJESTAD – Aruba Airport Authority N.V. (AAA) su Wings of Hope (WoH) ta hasi entrega oficial di solar panels na Colegio Cristo Rey como e ganador di e prome Energy Champion Competition.

Como parti di WoH su meta di “Affordable and Clean Energy”, Colegio Cristo Rey a wordo anuncia como e ganador absoluto na 2021 di e prome Energy Champion Competition y a ricibi AWG 20,000.00 pa ehecuta nan plan pa reduci consumo di energia di cual nan a kies pa instalacion di solar panels. Den presencia AAA su CEO Joost Meijs, WoH representa dor di Armand Kelly, Christine Kaarsbaan-Leo, Keyli Vrolijk, Selkys Winterdaal y Angeline Flemming, Colegio Cristo Rey su team y Sra. Baly di SKOA, a hasi entrega oficial di e solar panels na e scol. Cu e instalacion aki, Colegio Cristo Rey lo kier reduce nan consumo di energia anual cu 20%.

WoH’s su competencia tabata tambe pa concientiza y crea curiosidad bou di e studiante- y maestronan riba iniciativanan sostenibel. Despues di e prome competencia exitoso, WoH ta orguyoso pa anuncia cu lo tin un di dos competencia cu lo enfoca riba e 17 Sustainable Development Goals (SDGs) di United Nations. E aña aki scolnan primario y secundario por participa, caminda cada scol lo mester presenta nan plan sostenibel dor di selecta un of mas di e SDGs como nan meta principal. E ganador lo ricibi AWG 20,000.00 pa ehecuta nan plan.

WoH lo sigui inclui studiantenan y e comunidad di Aruba den diferente proyectonan y alabes crea concientizacion riba e importancia di practicanan sostenibel y encurasha un y tur pa acepta cambionan cu ta crea un mihor future sostenibel pa nos tur.