Minister Endy Croes:
PROYECTO “VEILIGE BARIOS” TA UN REALIDAD.
Gabinete Wever – Croes II a aloca alrededor 2 miyon florin pa e proyecto.
ORANJESTAD: Durante Feria Social informativo organisa pa Ministerio di Asuntonan Social y Husticia, Gobierno di Aruba a firma acuerdo cu CEDE Aruba den cuadro di e proyecto “Veilige Barios”, unda cu a compromete pa e proximo cinco añanan lo aloca fondonan pa e proyecto. E proyecto di “Veilige Barios” tin como meta pa mehora nos centronan di bario como tambe mehora e calidad di bida di cada ciudadano.
“Veilge Barios” ta un proyecto entre diferente Ministerio pa amplia actividadnan den centronan di bario rond Aruba. Un proyecto cu ta enfoca riba tres pilar sumamanete importante, e prome pilar; asuntonan social y husticia, di dos pilar: infrastructura y por ultimo lo percura pa tur centro di bario haya mas fondo pa asina por tin mas actividadnan den nos centronan di bario. Esaki sigur lo brinda oportunidad pa participa den programanan deportivo, artisanal, musical pero tambe programanan cu ta enfoca riba enseñansa y programa pa nos adultonan mayor. Un inversion di 2 miyon florin entre stakeholders manera Gobierno di Aruba, CEDE Aruba y fondonan internacional.
Concluyendo Minister Endy Croes ta gradici Minister Presidente Evelyn Wever – Croes pa sostene e proyecto, Minister Rocco Tjon pa bin cu e iniciativa. Como tambe pabien na Gabinete Wever- Croes II, na coleganan minister, CEDE Aruba y demas stakeholders. Alabes palabranan di pabien na tur nos centronan di bario pero sigur na nos comunidad unda e hobennan ta wordo poni central den e proyecto. Hunto nos ta logra.
