Partido MEP na Marisol Lopez Tromp
GABINETE WEVER-CROES, CU 8 MINISTER A MANEHA CU GASTO EKIVALENTE NA 7 MINISTER
Partido MEP a tuma nota cu ultimo dianan, oposicion y Parlamentario Marisol Lopez-Tromp especialmente, ta masha critico riba e advies di Raad van Advies (RvA) riba LIM. E instelling ministeries. Oposicion, cu semper a mantene nan gobernacion na 9 minister, aproba pa Marisol Lopez-Tromp, ta di opinion cu Gobierno por manda un minister cas, mientras Marisol Lopez-Tromp gustosamente tawata e di 8 minister den e coalicion di Gabinete Wever-Croes I.
Riba nan oponencia cu un minister menos tambe lo por, Partido MEP tin pa recorda oposicion, Marisol Lopez-Tromp y nan media liga, cu na final di 2017 y na 2021, Gabinete Wever-Croes a bay na 8 minister pa motibo cu tawata un coalicion den cual mester purba duna representacion segun resultado di eleccion, na unda cada partner den coalicion mester mira nan mes identifica den gobernacion.
Tambe, e maneho iresponsabel di e Gabinetenan Eman, lagando atras asina tanto problema financiero, economico y social pa nos pais, cu di parti di Partido MEP, nos tawata sa cu 7 minister lo no tawata suficiente pa e trabou pa pone bek nos pais riba e bon caminda financiero, economico y socialmente. E situacion di nos pais a cuminsa mehora den e di dos aña di gobernacion di Gabinete Wever-Croes I. Remarcable tambe ta cu, Gabinete Wever-Croes cu 8 minister a goberna cu gasto ekivalente na 7 minister compara cu Gabinete di AVP y a baha e gasto di salario di trahadornan pa ministerionan cu 27 miyon y a mantene e nivel aki tambe. Pues cu menos gasto, Gabinete Wever-Croes II ta haciendo hopi mas na bienestar di nos pais cu loke cu AVP a haci cu nan 9 ministernan.
Ademas, Gobierno ta manehando un pandemia y mester Goberna nos pais. Ta hustifica mas aun cu mester tin mas mandatario awor cu ora no tin pandemia. Y nos tur sa, cu Covid a laga nos den un situacion mucho pio cu AVP a laga nos aden, apesar cu AVP a hinca nos den e debe a sabiendas y sin pensa riba bienestar di nos pueblo.
Gabinete Wever-Croes, den ambos periodo di gobernacion, aunke trahando cu 8 minister enbes di 9 minister manera tawata e caso di e gobierno anterior, tawata y tin un carga di trabou enormemente grandi. Y specialmente, door cu Gobierno a impone un cantidad maximo di personeel na cada bureau, ta haci e trabou aun mas dificil pa traha cu menos minister. Asina mes, Gabinete Wever-Croes I y II, den tur e trubulencia, a sa di logra cosnan grandi pa nos pais apesar di e desaster di Eman y Covid-19.
