Parlamentario Setty Christiaans-Yarzagaray (MEP): Reunion Tripartiet cu topiconan pisa y interesante

E siman aki un delegacion di Aruba ta presente na Hulanda pa reunionnan di IPKO. Esakinan ta reunionnan interparlamentario entre Hulanda, Corsow, St. Maarten y Aruba pa trata diferente puntonan cu a keda pendiente entre e diferente Parlamentonan of sugerencia di punto(nan) nobo sugeri pa un di e Parlamentonan di un di e paisnan den Reino Hulandes.

E siman a cuminsa cu reunion Tripartiet na Hulanda cu ta reunion entre e Parlamentonan di Corsow, St. Maarten y Aruba. E reunion aki ta necesario pa e islanan como paisnan den Reino cuminsa atende cu puntonan cu mester wordo discuti entre nan y tambe pa prepara pa e puntonan cu lo bay wordo trata durante IPKO.

E reunion di Tripartiet a cuminsa cu un presentacion di Raad van State di Hulanda riba e puntonan di e rol y tareanan di Raad van State mes. Ademas di esey tambe riba e tema di “Procesreglement financieel toezicht” como tambe reaccion riba e dos conceptonan di ley di reino y tambe e tema di cambio climatico y su efecto riba paisnan den Reino den area di Caribe.

Durante tripartiet algun di e puntonan cu a wordo atendi entre e islanan ta relacion den Reino pa futuro en general, e tema di supervision financiero y brevemente un update riba e tema di Geschillenregeling. Un tema hopi importante cu e diferente Parlamento a ricibi un presentacion riba dje di parti di e projectleider di e team di investigacion di e Nationale Ombudsman ta e asunto di studiantenan di e islanan Aruba, Corsow y St. Maarten na Hulanda. Esaki a trata e problematica di vivienda pa cu nos studiantenan y tambe e problematica pa yega na un Burgerservicenummer (BSN nr). Basa riba un encuesta haci di parti di e Ombudsman a emiti un publicasion cu loke nan por a constata pero tambe a duna un lista di recomendacionnan.

Loke ta spera basa riba e rapport di e Ombudsman ta cu lo purba yega na solucionannan pronto pa cu number di BSN cu ta necesario pa studiantenan por cuminsa regla lo necesario pa por studia na Hulanda. Conclusion si ta cu e pa yega na solucion lo ta mester propone un cambio di ley pa por regla esaki. E tema di vivienda si ta un thema poco mas dificil pa yega na solucion mesora pero si a pone acento riba esaki durante e reunion y lo bay tuma e oportunidad pa papia cu coleganan Parlamentario Hulandes tambe riba e tema aki.