Parlamentario Ricky Hoek (MEP): Recordando e pioneronan di nos turismo
Conmemorando Dia Mundial di Turismo
Riba 27 di september, Dia Mundial di Turismo, trempan den oranan di mainta Gobierno di Aruba a organisa un acto protocolario dedica na e lider pionero di Aruba su turismo y alabes pa recorda e di 60 aña di fayecimento di Sr. Juan Enrique ‘Juancho’ Irausquin y tambe e di 15 aña di fayecimento di Sr. Ike Cohen. Di e forma aki a cuminsa cu e conmemoracion di Dia Mundial di Turismo. Presente na e mainta aki tanta Gobierno di Aruba y Secretario di conseho di minister, Parlamento di Aruba, ATA, representante di partido PPA, representante di famia di Ike Cohen y algun invitado mas.
Juancho Irausquin lider pionero y visionario
Sr. Juancho Irausquin tabata antes un bankero y despues a drenta e mundo di politica na Aruba. Tabata e vision di Sr. Irausquin pa a desaroya e industria di turismo na Aruba. Su logro grandi na aña 1959 ta e momento cu prome hotel grandi di Aruba, cu ta e Aruba Caribbean Hotel (awendia unda ta Hilton Hotel) a keda inaugura. Di e forma aki e vision y trabounan di Juancho Irausquin a inicia e industria economico mas importante di Aruba pa e decadanan cu a sigui.
Ike Cohen visionario y motor den turismo
Un cabayero hoben cu a bin Aruba na aña 1950 y tabata un cotnratista di verf pa Lago. Na 1964 Sr. Cohen a cumpra su prome hotel cu tabata Strand Hotel y despues a cambia su nomber pa ‘Talk of the Town’. Despues di su prome hotel, Sr. Cohen a construi Manchebo Beach Hotel, funda Calloway Catering services y Tec Agencies. Sr. Cohen semper a brinda nos localnan y tambe studiantenan e oportunidad di traha den e mundo hotelero y asina crece y bira profesionalnan den e mundo di hoteleria.
Di e forma aki tambe nos a para keto y recorda dos persona hopi importante pa e desaroyo di Turismo na nos isla. Sr. Irasquin y Sr. Cohen tawata dos di e personanan cu aporta na pone un fundeshi fuerte cu awe nos por sigui construi e producto ‘Aruba’ riba dje.