Parlamentario Shailiny Tromp-Lee: Reunionnan di IPKO ta canando manera plania
Nos ta tratando diferente topiconan interesante pa Reino y pa nos pais
E presentacion di Raad van State riba e prome dia sigur tabata uno interesante. Nan a trata diferente tema manera involvimento di islanan den Tratadonan Internacional. Kico ta e retonan riba e tereno aki y tambe kico ta e beneficionan. Tambe a trata art. 43 lid 2 (waarborg functie) di nos Statuut for di e bril di Raad van State. Loke sigur a resalta ta e sugerencia presenta cu e articulo aki por y mester keda uza den e sentido positivo y di ayudo pa nos islanan. Aki cambio di interpretacion y uzo ta rekeri y mas cu claro e “will” politico.
Prome dia a termina cu un discucion hopi interesante encuanto leynan di consenso conforme articulo 38 di Statuut. Loke e grupo di discucion cu ami a participa na dje a conclui ta cu e proceso encaunto e creacion di un ley di consenso mester keda debidamente describi. Alabes cu e palabra consenso mester bon defini y cu mester keda stipula cu Parlamento mester keda consulta y duna su aprobacion.
Mi persona sigur a enfatisa e hecho, relaciona cu Coho y Raft, cu e proceso encamina pa Hulanda a start completamente fout. Den un momento di chaos pa nos pais, caminda nos tabata hopi vulnerabel, nos a keda presenta cu un ley di consenso cu e label ‘take it or leave it’. Nos pais a keda obliga pa bay di acuerdo pasobra no tabata tin un otro manera pa nos por a mantene nos cabes riba awa. Y esaki mas cu claro a conduci cu Parlamento di Aruba no a bay di acuerdo cu ne. Sin laga afor e realidad cu tiki espacio real a keda brinda door di Hulanda na Aruba pa berdaderamente realisa cambionan na beneficio di nos pais.
E momentonan aki durante IPKO mi ta haya sumamente importante. No solamente pa nos por papia cu nos coleganan di Hulanda encuanto e situacion, pero tambe pa accentua e hecho cu nos mester traha riba nos relacion y cu esaki mester ta basa riba respet. Mi tin cu bisa cu pa loke ta trata e topico aki nos coleganan di Hulanda ta realisa enberdad cu e proceso no a keda encamina corectamente.
Awor nos tur ta pendiente riba e voorstel di e islanan, esta e onderlinge regeling, cu lo mester bin na lugar di e Leynan di Consenso y cu na comienso di oktober lo keda antendi entre gobiernonan. Asina mi ta spera nos por sera e capitulo aki na un mihor manera, comprondiendo otro y manteniendo e respet mutuo.
