Parlamentario Ricky Hoek (MEP):
Turismo di Aruba ta recuperando y innovando

Durante di e ‘World Tourism Day Conference’ organisa pa ATA riba diamars ultimo, Dia Mundial di Turismo, e CEO di ATA Sra. Ronella Croes a comparti e cifranan actual di loke ta trata e bishitantenan na nos isla. Asina a haci un comparacion cu mundo, caribe y Aruba – pa medio un grafico – pa loke ta trata e bishitantenan cu ta keda drumi na Aruba for di januari te cu juli 2022 compara cu aña 2019. E resultadonan tabata fenomenal. Den e grafico por mira na nivel di mundo a logra un 57% di recuperacion, den Caribe a yega un nivel di 82% y pa Aruba esaki ta un 94% di recuperacion di nos turismo compara cu aña 2019. E recuperacion aki tin un impacto positivo riba nos ecomonia y tambe nos animo di sigui traha pa nos progresa.

Banda di e estadistica di recuperacion, Sra. Croes a duna e proyeccionn actual cu tin pa loke ta turismo den 4 diferente categoria. E 4 categorianan cu ATA a menciona ta: Stay-over visitor arrivals, Tourism receipts, Hotel performance RevPAR, Cruis visitor arrivals.
Den e grafico aki bou por mira e 4 categorianan di cual e recuperacion actual ta keda compara cu 2019. Den e columna meymey por wak e preyeccion te cu final di 2022 y den e ultimo columna por wak e proyeccionnan pa 2023 den cada categoria. E grafico aki tambe ta ilustra un recuperacion substancial di entre 80% pa 112% pa e diferente categorianan di nos turismo cu ta e unico pilar economico y esun di mas importante.

Educacion y innovacion den turismo
Tabata un placer imenso di por a wak un grupo grandi di studiantenan di EPI sector Hospitalidad y Turismo y tambe di e facultad di Hospitalidad y Maneho di Turismo di Universidad di Aruba. Den un conversacion cu tanto e docentenan di Universidad di Aruba y studiantenan di EPI, por bisa cu nan ta sumamente contento di por a participa na e conferencia caminda hopi informacion valioso y educativo a bin dilanti. Asina por ehempel e cifranan cu ATA a presenta ta mustra e studiantenan con e turismo ta crece y den cua categoria e ta creciendo mas. Tambe, pa e loke ta trata e parti di maneho y strategia, esaki tabata un bon ‘les’ pa e studiante por a wak den ki direccion ATA kier hiba turismo di Aruba. Kendenan ta e partnernan principal y kico kier logra den añanan nos dilanti. Asina ATA a mustra tambe e importancia y balor agrega di incorpora mas tecnologia moderno y inteligencia artificial pa asina haci promocion pa Aruba cu un resultado hopi halto.