Partido MEP:
MARISOL NO TA HONESTO CU PUEBLO

E si a wanta duro na su stoel di e di 8 minister despues cu su fraccion a retira confiansa den dje.

Partido MEP ta haya cu ta hopi falta di honestidad y respet pa nos pueblo cu awo oposicion y especialmente Parlamentario Marisol Lopez-Tromp ta campaña pa manda un minister cas. AVP ta e partido cu semper a bay contra tur conseho pa baha di 9 pa 7 minister. Marisol Lopez-Tromp den mas di un gobernacion di mas di 7 minister, tawata minister. Y awo, e señora aki ta cuestiona y pidi pa Gobierno manda un minister cas.

MIKE EMAN HUNTO CU MARISOL A CAMBIA DI 7 PA 9 MINISTER
Na Aña 2013, aña di eleccion, gobierno a cambia di Gabinete Mike Eman I pa Mike Eman II.
Apesar cu e tempo ey ya caba Mike Eman y AVP a redobla debe di nos pais, y ya Hulanda a cuminsa pone presion pa supervision (cos cu AVP a tene secreto), toch Mike Eman a bay di 7 pa 9 minister. Juan David y Paul Croes mester a bira minister. Gobernador explicitamente den e formatie opdracht a bisa AVP pa NO bay na 9 minister mirando e situacion financiero di nos pais. Asina mes, toch nan a bay na 9 minister, 2 minister extra. Raad van Advies (RvA) e tempo ey, tambe a duna un negatief advies y tampoco di RvA, AVP a haci caso. Y tur esaki a bay cu aprobacion di Marisol Lopez-Tromp.

Cu 9 minister, cu aprobacion di Marisol Lopez-Tromp, AVP y Lopez-Tromp a hinca nos pais den mas debe y problema financiero y economico causando tambe e parti social bay enormemente atras. Contrario di Gabinete Wever-Croes, cu no solamente a mentene gasto ekivalente na 7 minister, pero a sa di logra cosnan grandi na bienestar di nos pais.

Ta bon pa nos corda tambe, cu Marisol Lopez-Tromp y Mervin Wyatt Ras tabata parlamentarionan pa AVP e tempo ey. Marisol Lopez-Tromp tabata Presidente di Parlamento pa AVP dia e LIM ey a wordo trata y aproba den Parlamento. Anto, net e dos individuonan aki, ta esnan cu mas ta critica awo pa manda un minister cas. Den un tempo cu nan sa masha bon cu nos pais mester di un gobierno solido pa hiba nos den recuperacion.

Awo pueblo por mira e deshonestidad di Marisol Lopez-Tromp. Pasobra tempo cu Marisol Lopez-Tromp a bira minister pa Gabinete Wever-Croes I, su partido y su mesun fraccion a retira confiansa den dje y no a sostene mas, Marisol Lopez-Tromp a purba wanta mas tanto y duro posibel na su stoel di Minister y no kier a retira como e di 8 minister.

E tempo ey, Marisol Lopez-Tromp mester a tuma honor na su mes y retira como e di 8 minister di Gabinete Wever-Croes I. E no a bay boluntariamente, pasobra pa Marisol e tempo ey si, 8 minister tawata bon. Ta obvio cu pa Lopez-Tromp, ora e ta den, 8 minister ta bon. Ora e ta afo, 8 minister no ta bon.

Un conseho di Partido MEP na politiconan di AVP, Marisol Lopez-Tromp y otronan: Den politica bo mester ta serio y consistente. No hipocrita y corupto!