Premier Evelyn Wever – Croes: EMBEYECIMENTO DI HOOIBERG TA PARTI DI E COMPROMISO PA ARUBA  MEHORA COMO PRODUCTO TURISTICO

ORANJETSAD – Hooiberg ta conoci como un di e sitionan caminda ciudadanonan y turistanan ta bay pa distraccion sano. Prome Minister Evelyn Wever – Croes a expresa cu e ta hopi contento di mira esfuersonan cu ta wordo haci door di Ministerio di Turismo, Minister Dangui Oduber conhuntamente cu ATA, TPEF, DOW y DIP pa por logra ‘upgrade’ y emebeyece e area.

Desde cu e pandemia a bati na nos porta, nos sa cu distraccion sano pafo di cas ta algo cu nos mester stimula. E tempo ey caba tabata recomenda tur hende pa sali pafo, keda menos paden etc. y asina a bin traha riba e proyecto di “outdoor ameneties”, caminda cu ta purba mas tanto cu ta posibel pa enfoca riba e areanan cu ta wordo bishita hopi y embeyecenan y mehoranan, Prome Minister Wever – Croes a splica.

E proyecto na Hooiberg lo bira hopi bunita y ohala cu e por atrae mas di nos ciudadanonan pa bin bishita y haci deporte cu e muchanan na e sitio, of simplemente relaha. Banda di esaki, Hooiberg ta un punto di atraccion di nos bishitantenan y pesey tambe e compromiso pa hacie mas nechi cu ta posibel, Prome Minister a agrega.

“Ora cu e pandemia a bati na nos porta, nos a bisa cu nos no ta bay solamente recupera, sino cu lo mehora. Esaki ta un di e ehempelnan di con ta mehorando nos producto turistico y mehorando experiencia pa nos propio ciudadanonan.”

Por ultimo Prome Minister Wever – Croes a gradici colega Minister Dangui Oduber cu no ta para keto, pero cu ta keda persevera pa haci poyectonan manera esun aki posibel. Ta gradici ATA y TPEF tambe pa nan sosten, aporte y iniciativa especialmente financiero cu ta wordo haci pa e proyectonan aki y tambe departamentonan di infrastructura cu ta  hunga un papel importante den esaki.