Minister Maduro di Finansa ta informa: Ta preparando un Memorando Financiero Economico nobo pa Aruba

E FEM 2 lo stipula e caminda nobo rumbo finansa publico manehabel

Na 2018 Minister di Finansa a laga traha un Memorando Financiero Economico FEM cu tabata e guia pa Gabinete Wever-Croes traha pa yega na un finansa publico balansa. E FEM a sirbi como base pa stipula un caminda pa yega surplus den aña 2021, pero na fin di aña 2019 caba Aruba a yega na e situacion di un surplus despues di 12 aña cu nos Pais a conoce solamente deficit presupuestario. Pa aña 2020 a premira un surplus di 46 miyon florin, pero destino a dicidi otro cu e pandemia di COVID cu a afecta Aruba su economia y finansa publico grandemente.

E realidad financiero ta cambia

E pandemia a cambia Aruba su panorama financiero na unda nos a perde un tercer parti di nos economia y cune Pais Aruba a perde 834 miyon florin na entrada den e ultimo 3 añanan. Gobierno mester a haci un prestamo di 1482 miyon florin di Hulanda pa por a sigura cu Aruba su economia por a wanta e efecto di e pandemia, pa tur hende por tabata tin un entrada digno, pa sigura e stabilidad di nos fondo di seguro social y di salubridad y pa cumpli cu e obligacion financiero di Aruba den exterior. Nos Pais a cuminsa recupera, turismo a yega e nivel di aña 2019 y cune nos economia ta recupera grandemente y entrada pa Gobierno ta premira di yega e nivelnan prome cu e pandemia. Sinembargo e pandemia ta laga Aruba atras cu un debe grandi riba e nivel di debe cu tabata grandi caba. E realidad financiero di Aruba ta bolbe cambia y ta pone cu mester haci algun cambio na e caminda cu nos a scoge pa yega na un finansa publico sostenibel.